वॉशिंग्टन, दि.28 – गेल्या सात वर्षापासून मुंबई दहशतवादी हल्ल्याचा खटला पाकिस्तानात रेंगाळत आहे. या खटल्यातील सात आरोपींना शिक्षा देणे जमत नसल्यास पाकिस्तानने त्यांना आंतरराष्ट्रीय न्यायालयाकडे सुपूर्द करावे, अशा शब्दात अमेरिकेने पाकिस्तानला खडसावले. अमेरिकन-भारत सार्वजनिक व्यवहार समितीतर्फे एका विशेष कार्यक्रमाचे आयोजन केले होते. त्यावेळी अमेरिकन संसदेच्या परदेशी व्यवहार समितीचे अध्यक्ष एड राइस यांनी ही मागणी केली.

या हल्ल्याचा सूत्रधार लष्कर-ए-तोयबाचा कमांडर झकीऊर रेहमान लखवी याच्यासह सर्व आरोपींना शिक्षा देण्यास पाकिस्तानात खटला सुरू आहे. हा खटला सात वर्षे सुरू असून वारंवार तारखा पडत आहे. या हल्ल्यात अमेरिकन नागरिक ठार झाल्याने अमेरिकेने कठोर भूमिका घेतली आहे. मुंबईत झालेल्या या हल्ल्याचे नियोजन, आर्थिक सहाय्य आणि अंमलबजावणी सात पाकिस्तानी नागरिकांनी केल्याचा आरोप आहे. मुंबईत झालेल्या या हल्ल्यात 166 जण ठार झाले होते.