कोलंबो दि. २४ – श्रीलंकेत सध्या भात पिकाची काढणी करण्याची वेळ आली आहे मात्र तेथे मजुरांची प्रंचड चणचण जाणवत असल्याने श्रीलंकेने भारतीय मजुरांना वर्क व्हीसा देण्याचा निर्णय घेतला असल्याचे खात्रीलायक वृत्त आहे. श्रीलंकन नागरिक प.आशिया, सिंगापूर, इटली आणि द. कोरियात मोठ्या प्रमाणावर स्थलांतर करत आहेत आणि त्यांना अटकाव करण्यात सरकार अपयशी ठरले आहे. परिणामी श्रीलंकेत आता शेतमजुरांची मोठीच टंचाई निर्माण झाली आहे असे कृषीमंत्री महिदा यापा अबायवर्धना यांनी जाहीर केले आहे.

यापूर्वीही भारतीय मजूर श्रीलंकेच्या उत्तरपूर्व भागात शेतमजुरी करत होतेच मात्र गेल्या वर्षी सिगापूर आणि मलायातील मजूर सोडून अन्य देशातील मजुरांना व्हिसा ऑन अरायव्हल देण्यास श्रीलंकेने बंदी घातली होती. आता लंकेच्या उत्तरमध्य आणि दक्षिण भागातही मजुरांची चणचण जाणवते आहे. त्यामुळे पर्यटन व्हीसाऐवजी वर्क व्हीसा दिला जावा अशी मागणी शेतकरी संघटना करू लागल्या आहेत. संरक्षण मंत्रालयाच्या परवानगी नंतर यासंबंधीचा अंतिम निर्णय जाहीर केला जाणार आहे असे समजते.