नवी दिल्ली, दि. १८ – अखेर आपला आडमुठेपणा सोडून तृणमूल काँग्रेसच्या सर्वेसर्वा आणि पश्चिम बंगालच्या मुख्यमंत्री ममता बेनर्जी यांनी संसदीय मंडळाच्या बैठकीत राष्ट्रपती पदासाठी युपीएचे उमेदवार प्रणवदांना पाठिंबा देण्याचे जाहीर केले. मात्र, हा निर्णय आपल्याला अतिशय दु:खद अंत:कारणाने घ्यावा लागत असल्याची पुस्तीही त्यांनी जोडली आहे.
केंद्रात सत्तेत युपीएबरोबर सहभागी असूनही सुरुवातीला ममतांनी प्रणवदांच्या नावाला विरोध करून सवतासुभा मांडण्याचा प्रयत्न केला. त्यांनी या पदासाठी माजी राष्ट्रपती डॉ. ए.पी.जे. अब्दुल कलाम यांचे नाव पुढे करण्याचा प्रयत्न केला. मात्र डॉ. कलाम यांनीच निवडणुकीत स्वारस्य नसल्याचे जाहीर केले. उपराष्ट्रपती पदासाठीही ममतांनी गोपाल कृष्ण गांधी यांचे नाव पुढे केले. त्यांनीही निवडणूक लढविण्याचे नाकारले. त्यामुळे ममता एकाकी पडल्या.
आपल्या देशातील अनेक पक्षांचा मुखर्जी यांना पाठिंबा आहे आणि आमचे मत आम्हाला बाद करायचे नाही. त्यामुळे अत्यंत दु:खद अंत:कारणाने मुखर्जी यांना पाठिंबा देण्याशिवाय आमच्यासमोर पर्याय नाही; असे ममता यांनी पत्रकारांना सांगितले.
