नवी दिल्ली, दि. १७ – स्वयंसेवी संघटनेच्या माध्यमातून मोफत संगणक प्रशिक्षणाच्या नावाखाली निमलष्करी दले आणि पोलिसांची फसवणूक केल्याप्रकरणी माजी पोलीस अधिकारी आणि टीम अण्णाच्या सदस्य किरण बेदी यांच्या विरोधात कोणतेही पुरावे न सापडल्याचा निर्वाळा दिल्ली पोलिसांनी दिला आहे.
निमलष्करी दले आणि पोलीस दलाला संगणक प्रशिक्षण देण्यासाठी मायक्रोसोफ्ट कंपनीच्या वतीने देण्यात आलेल्या निधीचा बेदी यांनी त्यांच्या स्वयंसेवी संस्थेच्या माध्यमातून गैरवापर केला. त्यांची चौकशी व्हावी अशी मागणी करणारी याचिका २७ नोव्हेंबर २०११ रोजी दिल्लीतील वकील देवेंद्रसिंह चौहान यांनी दिल्लेच्या न्यायालयात दाखल केली होती. त्यानुसार बेदी यांच्यावर फसवणूक आणि विश्वासघाताचा गुन्हा दाखल करून दिल्ली पोलिसांनी त्यांची चौकशी केली. या चौकशीत बेदी यांनी निधीचा गैरवापर करून फसवणूक अथवा विश्वासघात केल्याचे कोणतेही पुरावे हाती लागलेले नाहीत, असे पोलिसांकडून सांगण्यात आले.
या तपासाचा अंतिम अहवाल लवकरच दिल्ली पोलीस न्यायालयाला सादर करणार आहेत.
