भाजपमध्ये आता ‘कौन बनेगा मुख्यमंत्री?’साठी प्रयत्न सुरु

मुंबई – प्रसारमाध्यमांनी केलेल्या मतदानोत्तर चाचण्यांमधून भाजपाची सत्ता येण्याचे संकेत मिळाल्यानंतर शिवसेनेने देखील मवाळ धोरण घेण्याची वृत्ते झळकली आहेत. कालपर्यंत मुख्यमंत्रीपदाच्या शर्यतीत नसल्याचे सांगणार्‍या नितीन गडकरी, विनोद तावडे, पंकजा मुंडे यांनी मुख्यमंत्री पदाच्या शर्यतीत असल्याचे संकेत दिले आहेत. त्यामुळे आता भाजपचा मुख्यमंत्री कोण असा प्रश्न सर्वत्र जोरदार चर्चेत आला आहे. पंकजा मुंडे, नितीन गडकरी, देवेंद्र फडणवीस, एकनाथ खडसे आणि सुधीर मुनगंटीवार किंवा या सर्वांपेक्षा आणखी कोणी उमेदवार याबाबत आता तर्क-वितर्क सुरु झाले आहेत. या सर्वांमध्ये आता पंकजा मुंडे यांनी आपण मुख्यमंत्री झालो तर ही सदभाग्याची गोष्ट असेल असे म्हणून आपण स्पर्धेत असल्याचे संकेत दिले आहेत. कालपर्यंत केंद्रात खूष आहे असे म्हणणार्‍या नितीन गडकरी यांनी मुख्यमंत्री होण्याची इच्छा व्यक्त केली आहे आणि ती पूर्ण होत नसेल तर आपले पसंतीचे नाव म्हणून सुधीर मुनगंटीवार यांचे नाव पुढे केले आहे. भाजपच्या केंद्रीय नेतृत्वाच्या पसंतीचे नाव म्हणून देवेंद्र फडणवीस यांचे याआधीच नाव चर्चेत आहे. तर ज्येष्ठतेच्या निकषानुसार एकनाथ खडसे हे माजी विरोधी पक्ष नेते असल्याने त्यांचाच मुख्यमंत्री पदासाठी दावा योग्य ठरतो असे सांगितले जात आहे. निकाल हाती यायला केवळ २४ तास शिल्लक असताना मुख्यमंत्रीपदाच्या खुर्चीसाठी गरमा-गरमी सुरु झाली आहे.