प्रस्थापितांकडून मटण पाटर्यांवर २५ ते ३० कोटींची उधळपट्टी ?

अहमदनगर – यंदा सर्वच पक्ष वेगवेगळ्या निवडणूक लढवत असल्याने जिंकून येण्यासाठी सर्वांनीच कंबर कसली आहे. त्यासाठी गेल्या महिन्याभरापासून सर्वच उमेदवार, कार्यकर्ते जोरदार कामाला लागले आहेत. अशा स्थितीत कार्यकर्ते, मतदारांना खूश करण्यासाठी मटण, दारू यांच्यावर लाखो, करोडो रुपये खर्च होत आहेत. विशेषतः मटण पाटर्यांवर सर्वाधिक भर आहे. नगर जिल्ह्यातील राहुरी, शेवगाव, पाथर्डी, नेवासा, शिर्डी, श्रीगोंदा, पारनेर, नगर शहर, संगमनेर, कोपरगाव, श्रीरामपूर, कर्जत, जामखेड, अकोले या सर्वच मतदारसंघात कार्यकर्त्यांना व मतदारांना जेवणावळी सुरू आहेत. जिल्ह्यात आतापर्यंत किमान ५० हजारांहून अधिक बोकडांची कत्तल झाल्याचा अंदाज आहे. मटण पाटर्यांवर २५ ते ३० कोटींची उधळपट्टी झाल्याचा आणि मद्यावरही साधारण तितकीच उधळपट्टी झाल्याचा अंदाज व्यक्त करण्यात येत आहे. त्यामुळे गेल्या पंधरा दिवसांपासून मतदार तसेच कार्यकर्त्यांची मोठी चंगळ झाली आहे.