IND VS AUS : तू दिग्गज आहेस, पण आता म्हातारा झाला आहेस…असे बोलून यशस्वी जैस्वालने दिग्गज खेळाडूला केले गप्प

नॅथन लायनने एका पॉडकास्टदरम्यान खुलासा केला की तो पर्थमध्ये गोलंदाजी करत असताना तो यशस्वी जैस्वालशी बोलत होता. लायन म्हणाला, यशस्वी मला म्हणाला, तू दिग्गज आहेस, पण आता तू म्हातारा झाला आहेस. गोलंदाजी करताना त्याने मला हे म्हटले. यानंतर मी त्याला उत्तर दिले आणि म्हणालो, मित्रा खरे आहे, पण मला अजून मी म्हातारा झालो असे वाटत नाही.’

पर्थमध्ये यशस्वी जैस्वालने केवळ लायनसोबत स्लेजिंग केले नाही, तर मिचेल स्टार्कलाही सोडले नाही. या डावखुऱ्या फलंदाजाविरुद्ध स्टार्क अतिशय वेगवान गोलंदाजी करत होता, यादरम्यान जैस्वालने स्टार्कला सांगितले की, तू इतका वेगवान नाहीस. मात्र, सामन्यानंतर स्टार्कने दावा केला की, जैस्वाल यांच्याकडून असे काहीही ऐकले नाही.

पर्थमध्ये ऑस्ट्रेलियाला पराभूत करण्यात यशस्वी जैस्वालने महत्त्वाची भूमिका बजावली होती. जैस्वालला पहिल्या डावात खातेही उघडता आले नाही, पण दुसऱ्या डावात या खेळाडूने शानदार शतक झळकावले. जैस्वालने दुसऱ्या डावात 161 धावांची खेळी केली. त्याच्या या शतकाच्या जोरावर टीम इंडियाने दुसऱ्या डावात 487 धावांची मजल मारत ऑस्ट्रेलियाला 534 धावांचे लक्ष्य दिले होते आणि प्रत्युत्तरात ऑस्ट्रेलियन संघ केवळ 238 धावांवरच मर्यादित राहिला. टीम इंडियाने पर्थ कसोटी 295 धावांच्या विक्रमी फरकाने जिंकली.