गौतम गंभीरशी जुळवून खेळाडूंना येत नाही खेळता? रोहित शर्माचे मोठे वक्तव्य

मुंबई कसोटी गमावल्यानंतर भारतीय संघाचा कर्णधार रोहित शर्मा पत्रकार परिषदेसाठी आला होता. यादरम्यान त्याला गंभीर आणि त्याच्या कोचिंग स्टाफबद्दल विचारण्यात आले. गंभीरच्या कोचिंग स्टाफचे काम आतापर्यंत कसे होते, असा प्रश्न भारतीय कर्णधाराला विचारण्यात आला. यावर रोहितने मुख्य प्रशिक्षकाचा बचाव केला.

पराभवाची जबाबदारी स्वत:वर आणि सहकारी खेळाडूंवर टाकली. रोहित म्हणाला, ‘कोचिंग स्टाफ आतापर्यंत खूप चांगला आहे. त्याला येऊन थोडा वेळ झाला आहे. त्यामुळे आताच न्याय देणे योग्य नाही. आपल्या विचारांशी जुळवून घेणे आणि संघाच्या बाजूने निकाल देणे ही खेळाडूंची जबाबदारी आहे.

रोहित आणि गंभीर यांची जोडी ऑगस्टमध्ये श्रीलंका दौऱ्यात झाली होती, जिथे भारतीय संघ एकदिवसीय मालिका खेळला होता. टीम इंडियाने 27 वर्षांनंतर श्रीलंकेविरुद्ध वनडे मालिका गमावली होती. या मालिकेतील तिन्ही सामन्यांमध्ये टीम इंडिया ऑलआऊट झाली होती. भारतीय क्रिकेटच्या इतिहासात ही पहिलीच वेळ होती, जेव्हा टीम इंडिया वनडे मालिकेतील सर्व सामन्यांमध्ये ऑलआऊट झाली होती. गेल्या 45 वर्षात प्रथमच भारतीय संघाला वनडे मालिकेत एकही सामना जिंकता आलेला नाही.

श्रीलंकेने ३ सामन्यांची मालिका 2-0 अशी जिंकली होती. एक सामना बरोबरीत सुटला. त्यानंतर या दोघांनी कसोटी मालिकेत बांगलादेशचा 2-0 असा पराभव केला. त्यानंतर 36 वर्षांनंतर बंगळुरूमध्ये न्यूझीलंडविरुद्ध घरच्या कसोटी सामन्यात पराभवाचा सामना करावा लागला. पुणे कसोटी गमावल्यानंतर 12 वर्षांनंतर मायदेशात त्यांना मालिका गमवावी लागली आणि मुंबईत पराभूत झाल्यानंतर त्यांना 24 वर्षांनंतर घरच्या मैदानावर क्लीन स्वीप स्विकारावा लागला.