मोहम्मद रिझवानच्या नेतृत्वाखालील पाकिस्तानी क्रिकेट संघाचा प्रवास पराभवाने सुरू झाला आहे. एकदिवसीय मालिकेसाठी ऑस्ट्रेलिया दौऱ्यावर गेलेल्या पाकिस्तानी संघाला पहिल्या सामन्यात 2 गडी राखून पराभव स्वीकारावा लागला. मेलबर्न क्रिकेट ग्राउंडवर सोमवार 4 नोव्हेंबर रोजी खेळल्या गेलेल्या या सामन्यात दोन्ही बाजूंच्या वेगवान गोलंदाजांची कामगिरी पाहायला मिळाली, पण फरक एवढाच होता की ऑस्ट्रेलियन वेगवान गोलंदाज विकेट घेण्यासोबतच किफायतशीर ठरले. तसेच कसोटी संघाबाहेर असलेला स्टार फलंदाज बाबर आझम या मालिकेतून परतला, पण तो परतताच पाकिस्तानी संघाला पराभवाचा सामना करावा लागला. योगायोगाने त्याला संघातून वगळल्यानंतर पाकिस्तानने सलग 2 सामने जिंकून कसोटी मालिकेवर कब्जा केला होता.
AUS vs PAK : बाबर आझम येताच पुन्हा हरला पाकिस्तान, ऑस्ट्रेलियाने जिंकली पहिली वनडे
पाकिस्तानने प्रथम फलंदाजी केली, पण मेलबर्न क्रिकेट ग्राउंडच्या वेगवान आणि उसळत्या खेळपट्टीवर ऑस्ट्रेलियाच्या वेगवान गोलंदाजांसमोर त्यांना अडचणींचा सामना करावा लागला. कसोटीनंतर वनडेत दाखल झालेली अब्दुल्ला शफीक आणि सैम अयुब ही जोडी इथेही अपयशी ठरली. वनडेमध्ये पदार्पण करणाऱ्या अयुबला पहिल्याच षटकात मिचेल स्टार्कने बाद केले, तर पुढच्याच षटकात स्टार्कने शफीकलाही बाद केले. कसोटी संघातून वगळल्यानंतर एकदिवसीय मालिकेत पुनरागमन करणाऱ्या बाबर आझमने येताच काही चांगले फटके मारले, पण त्यानंतर तो लेगस्पिनरविरुद्ध अपयशी ठरला आणि ॲडम झाम्पाच्या गोलंदाजीवर तो बाद झाला.
पाकिस्तानचा नवा कर्णधार मोहम्मद रिझवानने बराच वेळ क्रीजवर राहून डावावर नियंत्रण ठेवले, पण तोही 44 धावा करून बाद झाला. पाकिस्तानने केवळ 117 धावांत 7 विकेट गमावल्या होत्या. येथेच नसीम शाहच्या फलंदाजीने संघाची स्थिती सुधारली. युवा वेगवान गोलंदाजाने आपल्या बॅटची ताकद दाखवत 40 धावा केल्या आणि संघाला 203 धावांपर्यंत नेले, यामुळे संघ स्पर्धेत टिकून राहिला. तर पदार्पण करणाऱ्या इरफान खान आणि शाहीन शाह आफ्रिदी यांनीही छोट्या पण उपयुक्त खेळी खेळल्या. ऑस्ट्रेलियाकडून स्टार्कने 3 तर कर्णधार पॅट कमिन्सने 2 बळी घेतले.
ऑस्ट्रेलियाची सुरुवातही चांगली झाली नाही आणि चौथ्या षटकापर्यंत मॅथ्यू शॉर्ट आणि जेक फ्रेझर-मॅकगर्क हे दोन्ही सलामीवीर पॅव्हेलियनमध्ये परतले. अशा वेळी स्टार फलंदाज स्टीव्ह स्मिथ आणि यष्टिरक्षक जोश इंग्लिश यांनी डावाची धुरा सांभाळली. दोघांनी मिळून पाकिस्तानी वेगवान गोलंदाजांवर हल्ला चढवला आणि झटपट धावा केल्या. दोघांमध्ये 85 धावांची भागीदारी झाली, ज्यामुळे ऑस्ट्रेलियाच्या विजयाचा पाया रचला गेला.
यावेळेपर्यंत ऑस्ट्रेलियन संघ मजबूत स्थितीत असल्याचे दिसत होते, पण अचानक हरिस रौफ आणि शाहीन शाह आफ्रिदी यांनी स्मिथ-इंग्लिससह ऑस्ट्रेलियन मधली फळी उद्ध्वस्त केली. काही वेळातच ऑस्ट्रेलियाची धावसंख्या 7 विकेट्स 155 अशी झाली. येथून कर्णधार पॅट कमिन्सने जबाबदारी स्वीकारली आणि त्यानंतर मिचेल स्टार्कच्या साथीने संघाला विजयाकडे नेले. कमिन्स 33 धावा करून नाबाद परतला.