बाबा सिद्दीकी यांच्या मतदार संघातून निवडणूक लढवणार लॉरेन्स? या पक्षाने केली आहे तयारी, मागवला उमेदवारी अर्ज

रिटर्निंग ऑफिसरला लिहिलेल्या पत्रात सुनील शुक्ला यांनी लॉरेन्स बिश्नोई याची स्वाक्षरी फॉर्मवर घेणार असल्याचा दावा केला आहे. बिश्नोई याची उमेदवारी वैध करण्यासाठी हे आवश्यक पाऊल आहे. आगामी विधानसभा निवडणुकीसाठी लॉरेन्स बिश्नोई याला पक्षाचे तिकीट ऑफर करण्यात आल्यानंतर काही दिवसांनी हे सांगण्यात आले आहे. पत्रात पक्षाने असाही दावा केला आहे की लॉरेन्स बिश्नोई याने मान्यता दिल्यास ते लवकरच 50 उमेदवारांची यादी जाहीर करतील.

लॉरेन्स बिश्नोई सध्या गुजरातमधील साबरमती तुरुंगात आहेत. नुकतेच राष्ट्रवादीचे नेते बाबा सिद्दीकी यांची हत्या आणि बॉलीवूड अभिनेता सलमान खानला धमकी दिल्याप्रकरणी त्याचे नाव चर्चेत आले होते. पश्चिम वांद्रे मतदारसंघाला राजकीय महत्त्व आहे. वास्तविक हा बाबा सिद्दीकी यांचा मतदारसंघ होता. उत्तर भारतीय विकास सेनेचे नेते सुनील शुक्ला यांनी प्रथम खार पोलीस ठाण्यात जाऊन नंतर बलकरन ब्रॅड यांच्या नावाने उमेदवारी अर्ज घेण्यासाठी रिटर्निंग ऑफिसरशी संपर्क साधला. लॉरेन्स बिश्नोई याचे खरे नाव बलकरन ब्रॅड आहे.

20 नोव्हेंबर रोजी 288 सदस्यीय महाराष्ट्र विधानसभेसाठी एकाच टप्प्यात निवडणूक होणार आहे, तर विधानसभा निवडणुकीची मतमोजणी 23 नोव्हेंबर रोजी होणार आहे. 2019 च्या विधानसभा निवडणुकीत भाजपला 288 सदस्यीय विधानसभेत सर्वाधिक 105 जागा मिळाल्या होत्या. त्याचवेळी भाजपचा मित्रपक्ष शिवसेनेला 56 जागा मिळाल्या होत्या. दुसरीकडे राष्ट्रवादी काँग्रेसला 54 तर मित्रपक्ष काँग्रेसला 44 जागा मिळाल्या होत्या.