गंभीरच्या इशाऱ्यावर या दोन दिग्गजांची उचलबांगडी, त्यांना टीम इंडियात मिळणार होती मोठी जबाबदारी

बांगलादेशविरुद्धच्या कसोटी मालिकेसाठी मॉर्केल भारतीय संघात सामील होऊ शकतो. त्याचा कार्यकाळ 2027 च्या विश्वचषकापर्यंत राहील. तो पुढील महिन्याच्या सुरुवातीला बेंगळुरू येथील राष्ट्रीय क्रिकेट अकादमीला रिपोर्ट करेल आणि दुलीप ट्रॉफीचे सामने पाहण्याची अपेक्षा आहे. तेथे पोहोचल्यानंतर तो व्हीव्हीएस लक्ष्मण आणि एनसीएचे गोलंदाजी प्रमुख ट्रॉय कुली यांचीही भेट घेणार आहे. वृत्तानुसार, माजी वेगवान गोलंदाज लक्ष्मीपती बालाजी आणि विनय कुमार हे गोलंदाजी प्रशिक्षकपदाच्या शर्यतीत मॉर्केलपेक्षा पुढे होते, परंतु गौतम गंभीरच्या शिफारसीनंतर त्याची निवड करण्यात आली आहे.

बीसीसीआयच्या एका सूत्राने नाव न सांगण्याच्या अटीवर पीटीआयला सांगितले की, क्रिकेट सल्लागार समितीचे (सीएसी) काम मुख्य प्रशिक्षकपदाच्या उमेदवारांची मुलाखत घेणार होते. सपोर्ट स्टाफची निवड करताना गंभीरच्या निवडीला प्राधान्य देणे गरजेचे होते. त्याने मॉर्केलसोबत काम केले आहे आणि गोलंदाजी प्रशिक्षक म्हणून त्याला खूप आदर दिला जातो. अशा परिस्थितीत म्हांबरे यांनी केलेले चांगले काम मॉर्केल पुढे नेणार, हे स्पष्ट झाल्यावर बालाजी आणि विनय यांच्या नावाचा विचार करण्यात आला नाही.

गंभीर आणि मॉर्केल यानीही आयपीएलमध्ये एकत्र काम केले आहे. या दोन्ही दिग्गजांनी आयपीएलमध्ये लखनौ सुपर जायंट्ससाठी काम केले. त्याच वेळी, गेल्या हंगामात गंभीर कोलकाता नाइट रायडर्समध्ये सामील झाल्यानंतरही मॉर्केल त्याच संघाचा भाग होता. 39 वर्षीय मॉर्नी मॉर्केलने 2018 साली आंतरराष्ट्रीय क्रिकेटमधून निवृत्ती घेतली. यानंतर मॉर्नी मॉर्केल गेल्या वर्षी भारतात झालेल्या एकदिवसीय चषकादरम्यान पाकिस्तान संघाचा प्रशिक्षक होता, परंतु संघाच्या खराब कामगिरीनंतर त्याने पाकिस्तान क्रिकेट बोर्ड (पीसीबी) सोबतचा करार संपण्याच्या काही महिन्यांपूर्वीच आपले पद सोडले. त्याने आपल्या कारकिर्दीत दक्षिण आफ्रिकेकडून 86 कसोटी सामने, 117 एकदिवसीय सामने आणि 44 टी-20 सामने खेळले. या काळात मॉर्नी मॉर्केलने कसोटीत 309, एकदिवसीय सामन्यात 188 आणि टी-20मध्ये 47 बळी घेतले. आयपीएलमध्येही तो खेळाडू म्हणून सहभागी झाला होता.