केरळमधील मुसळधार पावसानंतर वायनाडमध्ये झालेल्या भूस्खलनात पीडितांच्या मदतीसाठी आता अभिनेता प्रभास पुढे आला आहे. त्याने केरळच्या मुख्यमंत्री मदत निधीला 2 कोटी रुपये दिले आहेत. प्रभासच्या या वर्तनामुळे चाहते वेडे झाले आहेत आणि सोशल मीडियावर अभिनेत्याचे कौतुक करत आहेत. आतापर्यंत या आपत्तीतून मदत करणाऱ्या दक्षिण भारतीय स्टार्समध्ये प्रभासने सर्वाधिक रक्कम दान केली आहे.

29 जुलैच्या रात्री झालेल्या मुसळधार पावसामुळे संपूर्ण केरळमध्ये बिकट परिस्थिती निर्माण झाल्याची माहिती आहे. वायनाडमध्ये अनेक गावे उद्ध्वस्त झाली. मृतांचा आकडा 400 च्या वर गेला आहे, तर 206 हून अधिक लोक बेपत्ता आहेत. वायनाडमध्ये अजूनही शोध मोहीम सुरू असून पीडितांना मदत करण्याचे काम सुरू आहे.

प्रभासच्या आधी देणगी देणाऱ्या साऊथ स्टार्समध्ये राम चरण आणि त्याचे वडील चिरंजीवी, सूर्या, ज्योतिका, कार्ती, अल्लू अर्जुन, रश्मिका मंदान्ना आणि चियान विक्रम यांचा समावेश आहे. सूर्या, कार्ती आणि ज्योतिका यांनी मिळून 50 लाख रुपये, रश्मिका मंदान्ना यांनी 10 लाख रुपये, चियान विक्रम यांनी 20 लाख रुपये आणि रामचरण-चिरंजीवी यांनी 1 कोटी रुपयांची देणगी दिली. तर अल्लू अर्जुनने पीडितांसाठी 25 लाखांची मदत केली आहे.

सोशल मीडियावर चाहते प्रभासच्या दयाळूपणाचे कौतुक करत आहेत. एका चाहत्याने लिहिले आहे की, ‘प्रभास हा काही खास कारणांमुळे सर्वांच्या मनाचा राजा आहे.’ दुसऱ्या एका चाहत्याने लिहिलं आहे की, ‘प्रभास आपल्या लोकांच्या मदतीसाठी नेहमी तयार असतो.’ प्रोफेशनल फ्रंटबद्दल बोलायचे झाले तर प्रभास नुकताच ‘कल्की 2898 एडी’ या चित्रपटात दिसला होता. आता तो ‘कनप्पा’ आणि ‘राजासाब’ या दोन चित्रपटांमध्ये दिसणार आहे.