ऑलिम्पिकमध्ये पदक जिंकणे, हे प्रत्येक खेळाडूचे स्वप्न असते. यावेळी जलतरण स्पर्धेत पदक जिंकण्याचा अनोखा विक्रम पाहायला मिळाला. 22 वर्षीय फ्रेंच जलतरणपटू लिओन मॅचॉनने पॅरिस ऑलिम्पिक 2024 मध्ये अशी कामगिरी केली आहे, जी यापूर्वी 1976 मध्ये दिसली होती. प्रसिद्ध ऑलिम्पिक जलतरणपटू मायकेल फेल्प्सचे माजी प्रशिक्षक बॉब बोमन यांच्याकडून प्रशिक्षण घेतलेल्या लिओन मॅचॉनने या ऑलिम्पिकमध्ये आतापर्यंत 3 पदके जिंकली आहेत.

30 जुलै हा दिवस लिओन मॅचॉनसाठी अतिशय संस्मरणीय होता. त्याने 200 मीटर बटरफ्लाय आणि 200 ब्रेस्टस्ट्रोकमध्ये सुवर्णपदक पटकावले. 1976 नंतर पहिल्यांदाच एका जलतरणपटूने ऑलिम्पिक स्पर्धेत एकाच दिवशी दोन सुवर्णपदके जिंकली आहेत. त्याने हंगेरीचा सध्याचा चॅम्पियन आणि जागतिक विक्रम धारक क्रिस्टोफ मिलाकचा पराभव करून 200 मीटर बटरफ्लायमध्ये सुवर्णपदक जिंकले. त्याच वेळी, त्याने 200 मीटर ब्रेस्टस्ट्रोकमध्ये 2:05.85 च्या ऑलिम्पिक विक्रमासह जिंकले. यासह, जलतरणात तीन सुवर्णपदके जिंकणारा तो पहिला फ्रेंच खेळाडू ठरला.

फ्रान्समधील टूलूस येथे जन्मलेल्या 22 वर्षीय लिओन मॅचॉनची मुळे पोहण्याशी संबंधित आहेत. लिओन मॅचॉनचे वडील झेवियर यांनी 1996 मध्ये अटलांटा गेम्स आणि 2000 मध्ये सिडनी ऑलिम्पिकमध्ये फ्रान्सचे प्रतिनिधित्व केले. अटलांटा 1996 मध्ये, झेवियर 200 मीटर वैयक्तिक मेडलीमध्ये 8 व्या स्थानावर राहिला. चार वर्षांनंतर, तो सिडनी 2000 मध्ये 7 व्या स्थानावर राहिला. लिओन मॅशॉनची तुलना अनेकदा मायकेल फेल्प्सशी केली जाते. दरम्यान, लिओन मॅचॉनची आई सेलीनने बार्सिलोना 1992 मध्ये चार स्पर्धांमध्ये भाग घेतला होता. 200 मीटर वैयक्तिक शर्यतीत ती 14 व्या स्थानावर राहिली होती.

लिओन मॅचॉनला मायकल फेल्प्सचे माजी मार्गदर्शक बॉब बोमन यांनी प्रशिक्षण दिले आहे. लिओन मॅचॉनने अमेरिकेतील ॲरिझोना स्टेट युनिव्हर्सिटीमध्ये तीन वर्षे पोहले. त्यानंतर तो बोमनसोबत टेक्सास विद्यापीठात गेला. बोमनने ऑलिम्पिक सुरू होण्यापूर्वी सांगितले होते की, लिओनमध्ये अशा अनेक गोष्टी आहेत, ज्या त्याला महान बनवतात. त्याच्याकडे वेग आहे आणि सहनशक्ती आहे. त्यामुळे त्याच्याकडे आपल्याला हवे, ते सर्व आहे आणि त्याने आतापर्यंत दबावाखाली चांगली कामगिरी केली आहे, हा त्या समीकरणाचा दुसरा भाग आहे. त्याच्याकडे खरोखर सर्वकाही आहे. आता लिओन मॅचॉनने तसाच खेळ करून दाखवून दिले आहे.