T20 World Cup : उपांत्य फेरीच्या सामन्यातील खेळपट्टीवरुन गोंधळ, राशिद खानने उपस्थित केला मोठा प्रश्न

अफगाणिस्तानचा कर्णधार राशिद खानने टी-20 विश्वचषकाच्या पहिल्या उपांत्य फेरीत नाणेफेक जिंकून प्रथम फलंदाजी करण्याचा निर्णय घेतला. त्याच्या संघाचे फलंदाज फलंदाजीला आले, तेव्हा खेळपट्टीवर एक असमान उसळी दिसली. याशिवाय सामन्यात वापरण्यात आलेल्या खेळपट्टीवर अनेक तडे गेले होते. ऑस्ट्रेलियाचा माजी कर्णधार रिकी पाँटिंग आणि दक्षिण आफ्रिकेचा दिग्गज क्रिकेटपटू शॉन पोलॉक यांनी पिच रिपोर्टमध्ये याचा उल्लेख केला होता. याच कारणामुळे अफगाणिस्तानच्या फलंदाजांनी पहिल्या डावात दक्षिण आफ्रिकेसमोर शरणागती पत्करली, तेव्हा प्रश्न उपस्थित होऊ लागले.

So Afghanistan qualify for the WC semi winning in St Vincent on Monday night .. 4 hr flight delay on Tues to Trinidad so no time to practice or get accustomed to a new venue .. utter lack of respect to players i am afraid .. #T20WorldCup2024

— Michael Vaughan (@MichaelVaughan) June 27, 2024

कॉमेंट्री दरम्यान संजय मांजरेकर आणि नवज्योत सिंग सिद्ध यांनी खेळपट्टीचे वर्णन केले आणि आयसीसीवर प्रश्न उपस्थित केले. दोन्ही दिग्गज समालोचकांच्या मते, इतक्या महत्त्वाच्या सामन्यात अशी खराब खेळपट्टी निराशाजनक आहे. न्यूयॉर्कपेक्षाही वाईट खेळपट्टी असे त्याचे वर्णन केले आहे. मोहम्मद कैफने सामन्यानंतर विश्लेषण करताना ही खेळपट्टी खराब असल्याचे म्हटले.

अफगाणिस्तानचा कर्णधार राशिद खाननेही आयसीसी प्रणालीवर प्रश्न उपस्थित केले आहेत. त्याने नाणेफेकीदरम्यान सांगितले होते की, त्याचे विमान त्रिनिदादला 4 तास उशिरा पोहोचले. त्यामुळे संघाला विश्रांती आणि सरावाची संधी मिळाली नाही. इंग्लंडचा दिग्गज खेळाडू आणि समालोचक मायकल वॉनने सामन्यापूर्वीच ही बाब समोर आणली होती आणि अफगाणिस्तानबद्दल चिंता व्यक्त केली होती, ज्याचा परिणाम सामन्यातही दिसून आला.

भारतीय संघालाही अफगाणिस्तानसारख्या परिस्थितीचा सामना करावा लागू शकतो. जर टीम इंडियाने उपांत्य फेरीत इंग्लंडला हरवले, तर त्याला मधले अंतर मिळणार नाही. पावसामुळे उड्डाणांना विलंब होऊ शकतो आणि अंतिम सामना स्थानिक वेळेनुसार सकाळी 10:30 पासून होणार असल्याने सराव आणि विश्रांतीची संधी मिळण्याची शक्यता कमी आहे.