Ind vs Afg : सुपर-8 मध्ये अफगाणिस्तानचे डावखुरे गोलंदाज ठरणार रोहित शर्मा आणि विराट कोहलीसाठी डोकेदुखी?

रोहित शर्मा हा सर्वात धोकादायक सलामीवीरांपैकी एक आहे, पण त्याने नेहमीच डाव्या हाताच्या वेगवान गोलंदाजांविरुद्ध संघर्ष केला आहे. या T20 विश्वचषकात त्याने तीन सामन्यांमध्ये फलंदाजी केली आहे, ज्यामध्ये तो एकदा दुखापतग्रस्त झाला आणि दोनदा तो बाद झाला. दोन्ही वेळा त्याची विकेट डाव्या हाताच्या वेगवान गोलंदाजाने घेतली होती. पाकिस्तानविरुद्ध त्याला शाहीन आफ्रिदीने बाद केले, तर अमेरिकेविरुद्ध सौरभ नेत्रावलकरने पॉवरप्लेमध्ये त्याला बाहेरचा रस्ता दाखवला. विराट कोहलीही अनेकदा डाव्या हाताच्या गोलंदाजांविरुद्ध संघर्ष करताना दिसला. अमेरिकेचा डावखुरा वेगवान गोलंदाज सौरभ नेत्रावलकरने त्याला या स्पर्धेत बाद केले आहे. अशा परिस्थितीत अफगाणिस्तानचा डावखुरा वेगवान गोलंदाज फजलहक फारुकी पॉवरप्लेमध्ये दोन्ही फलंदाजांसाठी धोकादायक ठरू शकतो.

फारुकी या स्पर्धेत धोकादायक फॉर्ममध्ये दिसत आहे. पॉवरप्लेमध्ये त्याने स्विंगिंग बॉल्सने फलंदाजांना खूप त्रास दिला आहे. त्याने आतापर्यंत 4 सामन्यात 12 विकेट घेतल्या आहेत. यासह तो या स्पर्धेतील सर्वाधिक बळी घेणारा गोलंदाज ठरला आहे. त्याने पॉवरप्लेमध्ये 12 पैकी 9 विकेट घेतल्या आहेत. फारुकीशिवाय नूर अहमद टीम इंडियासाठी अडचणीचे कारण बनू शकतो. डाव्या हाताच्या फिरकीपटूविरुद्ध धावा करण्यात कोहली अपयशी ठरला आहे. याशिवाय आयपीएलमध्ये गुजरात जायंट्सकडून खेळणाऱ्या नूर अहमदने त्याला नेहमीच त्रास दिला आहे.

अफगाणिस्तानचा कर्णधार आणि सर्वात यशस्वी गोलंदाजांपैकी एक असलेल्या राशिद खानचे उत्तर भारताकडे आहे, ही भारतासाठी दिलासादायक बाब आहे. सूर्यकुमार यादव आणि शिवम दुबे यांनी नेहमीच त्याच्यावर वर्चस्व गाजवले. सूर्याने त्याच्याविरुद्ध 58 चेंडूंचा सामना केला, ज्यामध्ये तो एकदाही बाद झालेला नाही आणि त्याने 148 च्या स्ट्राइक रेटने 86 धावा केल्या. स्पिनर्सविरुद्ध षटकार मारण्यासाठी प्रसिद्ध असलेला शिवम दुबे त्याच्याविरुद्ध 155 च्या स्ट्राइक रेटने फलंदाजी करतो. याशिवाय राशिदचा गेल्या दोन वर्षांत टीम इंडियाविरुद्ध टी-20 मधला रेकॉर्ड खूपच खराब आहे.