IPL 2024 मध्ये शुभमन गिलचा फॉर्म ढासळत असला, तरी असे असतानाही पाकिस्तानच्या पांढऱ्या चेंडूच्या क्रिकेटच्या नव्या प्रशिक्षकाने त्याचे खूप कौतुक केले. त्याने गिलचे समर्थन केलेआहे. त्याच्या क्षमतेवर विश्वास व्यक्त केला आहे. पाकिस्तानचे पांढऱ्या चेंडू क्रिकेट संघाचे नवे प्रशिक्षक गॅरी कर्स्टन आहेत, जे सध्या IPL 2024 मध्ये गुजरात टायटन्सचे मार्गदर्शक आहेत. IPL 2024 मध्ये शुभमन गिलच्या नेतृत्वाखाली गुजरात टायटन्सची अवस्था वाईट आहे. संघाने आतापर्यंत खेळलेल्या 11 पैकी केवळ 4 सामने जिंकले आहेत. पण, असे असूनही कर्स्टन गिलच्या कर्णधारपदाने प्रभावित झाल्याचे दिसले.

चेन्नई सुपर किंग्जविरुद्धच्या सामन्यापूर्वी कर्स्टन म्हणाले की, गिल कर्णधार म्हणून खूप परिपक्व आहे आणि पुढील 3 सामन्यांमध्ये त्याच्या खेळाडूंकडून सर्वोत्तम कामगिरी करुन घेण्याची क्षमता त्याच्याकडे आहे. IPL 2024 मध्ये गुजरात टायटन्सची अवस्था नक्कीच वाईट आहे. कॅप्टन शुभमनची बॅटही शांत आहे, ही चिंतेची बाब आहे.

CSK विरुद्धच्या सामन्यापूर्वी पत्रकार परिषदेत गॅरी कर्स्टन म्हणाले की, गिल त्याच्या कर्णधारपदाचा आनंद घेत आहे, असे मला वाटते. त्याला प्रभुत्व मिळविण्यासाठी वेळ लागेल. पण मला विश्वास आहे की तो या भूमिकेचा आनंद घेत आहे. तो पुढे म्हणाला की तो जागतिक दर्जाचा खेळाडू आहे आणि, मला शंका नाही की तो पुढील 3 सामन्यांमध्ये 1 किंवा 2 चांगली खेळी करताना दिसेल.

शुभमन गिलने आयपीएलच्या मागील हंगामात खेळल्या गेलेल्या 17 सामन्यात 890 धावा केल्या होत्या. तो लीगमध्ये सर्वाधिक धावा करणारा खेळाडू होता. पण, आयपीएल 2024 मधील त्याची कहाणी अगदी उलट आहे. आतापर्यंत खेळलेल्या 11 सामन्यांमध्ये शुभमनच्या बॅटने 137.61 च्या स्ट्राईक रेटने केवळ 322 धावा केल्या आहेत. अशा परिस्थितीत सीएसकेला घरच्या मैदानावर हरवून गुजरातला स्पर्धेतील आपल्या आशा जिवंत ठेवायच्या असतील, तर गिलला त्याच्या खराब फॉर्मवर नियंत्रण ठेवावे लागेल.