आयपीएल 2024 मध्ये जर चाहते कोणत्याही फलंदाजाची सर्वाधिक वाट पाहत असतील, तर तो सध्याच्या घडीला बहुधा शिवम दुबे आहे. चेन्नई सुपर किंग्जच्या फलंदाजाने यंदा चांगलीच खळबळ उडवून दिली आहे. शिवम दुबे जेव्हा जेव्हा क्रिजवर येतो, तेव्हा षटकारांचा पाऊस हमखास असतो. दुबेने लखनौ सुपरजायंट्सविरुद्धही असेच केले. या डावखुऱ्या फलंदाजाने अवघ्या 27 चेंडूत 66 धावांची खेळी केली ज्यात त्याच्या बॅटमधून 7 षटकार आले. शिवम दुबेच्या या खेळीने अनेक महान भारतीय क्रिकेटपटूंना त्याचे प्रशंसक बनवले आणि आता त्याला कोणत्याही परिस्थितीत टी-20 विश्वचषकात खेळवण्याची मागणी होत आहे.
लखनौविरुद्ध दुबेची फलंदाजी पाहिल्यानंतर टीम इंडियाचा माजी क्रिकेटर सुरेश रैनाने भारतीय संघाचे मुख्य निवडकर्ता अजित आगरकरला टॅग करत ट्विट केले. अजित आगरकरने भाऊ शिवम दुबेची टी-20 वर्ल्डकपसाठी निवड करावी, असे त्याने लिहिले आहे. रैनाच नाही, तर इरफान पठाण, आकाश चोप्रा यांनीही शिवम दुबेची निवड करण्यास सांगितले.
World Cup loading for Shivam dube ! @imAagarkar bhai select karo please 🇮🇳🙏 https://t.co/b7g0BxHRSp
— Suresh Raina🇮🇳 (@ImRaina) April 23, 2024
शिवम दुबेने या मोसमात 8 सामन्यात 311 धावा केल्या आहेत. त्याची फलंदाजीची सरासरी 51 पेक्षा जास्त आहे. या खेळाडूचा स्ट्राईक रेटही 170 च्या जवळ आहे. दुबेने या मोसमात तीन अर्धशतके झळकावली आहेत आणि त्याच्या बॅटमधून 23 चौकार आणि 22 षटकार आले आहेत. दुबेचे हे आकडे दाखवतात की तो किती उत्कृष्ट फॉर्ममध्ये आहे. मोठी गोष्ट म्हणजे दुबे मधल्या षटकांमध्ये या धावा करतो. तो चौथ्या किंवा पाचव्या क्रमांकावर फलंदाजीला येतो. बरं, इथे प्रश्न असा आहे की दुबेला टीम इंडियात संधी मिळाली, तर तो कोणाची जागा घेणार? कारण मधल्या फळीत सूर्यकुमार यादव, हार्दिक पांड्यासारखे खेळाडू आधीच उपस्थित असू शकतात. पंतही टीम इंडियात पुनरागमन करू शकतो, असे बोलले जात आहे. अशा परिस्थितीत दुबेला संधी कुठे मिळणार, हा सर्वात मोठा प्रश्न आहे.