श्वास घेण्यास त्रास होत असल्याची तक्रार घेऊन रुग्णालयात आलेल्या रुग्णाची तपासणी करताना डॉक्टरांच्या पथकाला धक्काच बसला. डॉक्टरांनी रुग्णाच्या फुफ्फुसातून चार सेंटीमीटर लांबीचा झुरळ काढला आहे. केरळमधील कोचीमध्ये ही धक्कादायक घटना घडली आहे. रुग्ण आता पूर्णपणे बरा आहे. त्याला रुग्णालयातून डिस्चार्जही देण्यात आला आहे.
एशियानेट न्यूजएबलच्या वृत्तानुसार, 55 वर्षीय रुग्णाला श्वासोच्छवासाचा गंभीर त्रास होत असल्याने कोची येथील अमृता रुग्णालयात पोहोचले होता. डॉक्टरांनी त्याच्या फुफ्फुसाची तपासणी केली, तेव्हा आतील भाग पाहून ते थक्क झाले. कारण, चार सेंटीमीटर लांब झुरळ फुफ्फुसात अडकले होते. त्यामुळे त्या व्यक्तीला श्वास घेण्यास त्रास होत होता. डॉक्टरांच्या पथकाने त्याच्यावर यशस्वी शस्त्रक्रिया केली.
रिपोर्टनुसार, 22 फेब्रुवारीला डॉ. टिंकू जोसेफ यांच्या नेतृत्वाखाली ही शस्त्रक्रिया करण्यात आली. आत झुरळ सडले होते. त्यामुळे कदाचित रुग्णाच्या श्वसनाचा त्रास वाढला असावा. रुग्णाच्या फुफ्फुसातून झुरळ यशस्वीपणे काढण्यासाठी डॉक्टरांना आठ तास लागले. डॉक्टर जोसेफ यांनी सांगितले की रुग्णाला आधीच श्वासोच्छवासाचा त्रास होता, त्यामुळे शस्त्रक्रिया गुंतागुंतीची झाली.
आता एवढे मोठे झुरळ त्या व्यक्तीच्या फुफ्फुसात कसे पोहोचले असा प्रश्न तुम्हाला पडला असेल. हे देखील उघड झाले आहे. अहवालानुसार, आधीच्या उपचारांसाठी रुग्णाच्या गळ्यात ठेवलेल्या नळीतून झुरळ फुफ्फुसात पोहोचले होते. डॉक्टर जोसेफ यांनी सांगितले की, रुग्ण आता पूर्णपणे बरा असून त्याला रुग्णालयातून डिस्चार्ज देण्यात आला आहे.
अलीकडेच दिल्लीतील डॉक्टरांच्या पथकाने 26 वर्षीय तरुणाच्या आतड्यातून 39 नाणी आणि 37 अंगठ्या काढल्या होत्या. वारंवार उलट्या आणि पोटदुखीच्या तक्रारीनंतर तरुणाने हॉस्पिटल गाठले होते. दिल्लीच्या श्री गंगाराम हॉस्पिटलमध्ये ही शस्त्रक्रिया करण्यात आली. वृत्तानुसार, बॉडी बिल्डिंगसाठी शरीरात झिंक वाढवण्याच्या उद्देशाने तरुणाने हे कृत्य केले होते.
गेल्या वर्षी तैवानमधूनही एक धक्कादायक बातमी आली होती. जिथे डॉक्टरांनी महिलेच्या किडनीतून 300 हून अधिक खडे काढले होते. इंडिपेंडंटने वृत्त दिले की महिलेने स्वतःला हायड्रेटेड ठेवण्यासाठी फक्त गोड पेये प्यायली.