शिवम दुबेने गेल्या दोन वर्षांत आपल्या खेळात कमालीची सुधारणा केली आहे. आधी त्याने आयपीएलमध्ये आपली धमक दाखवली आणि त्यानंतर टीम इंडियात परतल्यानंतर अफगाणिस्तानविरुद्धच्या टी-20 मालिकेत त्याने अप्रतिम फलंदाजी केली. पण आता या खेळाडूसोबत असे काही घडले आहे, ज्यामुळे चेन्नई सुपर किंग्जच्या अडचणी वाढल्या आहेत. शिवम दुबेमुळे धोनीचीही डोकेदुखी वाढली आहे. वास्तविक, रणजी ट्रॉफी सामन्यात दुबेला दुखापत झाली आणि तो या स्पर्धेतून बाहेर पडला, पण यासोबतच त्याला आयपीएलचे सुरुवातीचे सामने खेळणे कठीण झाले आहे.
22 मार्चपासून आयपीएल 2024 सुरू होणार आहे आणि त्यापूर्वी तो जखमी झाला आहे. आसामविरुद्धच्या रणजी सामन्यात दुबेला दुखापत झाली होती. त्याच्या ओबलिक्स स्नायूंमध्ये ताण आहे आणि ही दुखापत गंभीर असेल, तर तो आयपीएलच्या सुरुवातीच्या सामन्यांमधून बाहेर पडू शकतो. या दुखापतीनंतर शिवम दुबे आता बंगळुरू येथील राष्ट्रीय क्रिकेट अकादमीत जाणार असून, तेथे त्याला तंदुरुस्त करण्यासाठी प्रयत्न केले जातील. चेन्नई सुपर किंग्जच्या अधिकाऱ्यांनी सध्या दुबेच्या दुखापतीच्या गांभीर्याबद्दल त्यांना फारशी माहिती नसल्याचे म्हटले आहे.
शिवम दुबेला ज्या प्रकारची दुखापत झाली आहे, ती बरी होण्यासाठी एक ते दीड महिना लागतो. दुबे 6 आठवडे बाहेर राहिला, तर त्याला आयपीएलच्या सुरुवातीच्या सामन्यांमध्ये खेळणे कठीण होईल. शिवम दुबे चेन्नई सुपर किंग्जच्या मिडल ऑर्डरचा महत्त्वाचा भाग आहे. धोनी त्याच्या जागी कोणत्या खेळाडूला संधी देणार हा प्रश्न आहे.
शिवम दुबे उत्कृष्ट फॉर्ममध्ये होता. अफगाणिस्तानविरुद्धच्या टी-20 मालिकेत त्याने 3 सामन्यांमध्ये सर्वाधिक 124 धावा केल्या, त्याला मालिकावीर म्हणूनही निवडण्यात आले. अशा परिस्थितीत त्याची दुखापत सीएसकेसाठी मोठा धक्का आहे.