अक्षय कुमार आणि टायगर श्रॉफचा ‘बडे मियाँ छोटे मियाँ’ रिलीज होण्याआधीपासूनच चर्चेत आहे. टायगर आणि अक्षय हे दोन ॲक्शन स्टार या चित्रपटात पहिल्यांदाच एकत्र दिसणार आहेत. या चित्रपटात साऊथ स्टार पृथ्वीराज सुकुमारन मुख्य खलनायकाच्या भूमिकेत दिसणार आहे. खलनायक पृथ्वीराज या चित्रपटात कोणत्या प्रकारचे पात्र साकारणार आहे आणि अक्षय आणि टायगरसाठी तो कशाप्रकारे अडचणी निर्माण करणार आहे, याविषयी एक मोठे अपडेट समोर आले आहे.
आर्टिफिशियल इंटेलिजन्स (AI) हा शब्द गेल्या काही काळापासून चर्चेत आहे. आता हा शब्द तुम्हाला अक्षय आणि टायगरच्या चित्रपटातही ऐकायला मिळणार आहे. वास्तविक, ‘बडे मियाँ छोटे मियाँ’मध्ये पृथ्वीराज सुकुमारन एका वैज्ञानिकाची भूमिका साकारत आहे, जो एआयचा गैरवापर करतो. या चित्रपटातील पृथ्वीराज सुकुमारन यांच्या व्यक्तिरेखेचे नाव कबीर असणार आहे. चित्रपटात पृथ्वीराजची व्यक्तिरेखा अतिशय बुद्धिमान दाखवण्यात आली आहे. तो खलनायक आहे, पण तो सामान्य खलनायकाप्रमाणे आपली ताकद वापरत नाही, उलट तो त्याच्या मेंदूचा वापर करून लढतो.
चित्रपटाचे दिग्दर्शक अली अब्बास जफर यांनी आधीच सांगितले आहे की, ‘बडे मियाँ छोटे मियाँ’ ॲक्शनप्रेमींसाठी एक ट्रीट असेल. हा चित्रपट वास्तविक वाटेल अशा अॅक्शनचे वचन देतो. ‘बडे मियाँ छोटे मियाँ’चे शूटिंग मुंबई, लंडन, अबुधाबी आणि जॉर्डनमध्ये झाले आहे. या चित्रपटाचा टीझर आधीच आला आहे, ज्याला खूप पसंती मिळाली आहे. नुकतेच या चित्रपटाचे शीर्षक गीतही रिलीज करण्यात आले आहे.
‘बडे मियाँ छोटे मियाँ’ची निर्मिती वाशू भगनानी, जॅकी भगनानी आणि दीपशिखा देशमुख करत आहेत. चित्रपटाच्या दिग्दर्शनासोबतच याचे लेखनही अली अब्बास जफरने केले आहे. अली अब्बास जफरने यापूर्वी सलमान खानसोबत टायगर जिंदा है सारखे ॲक्शन थ्रिलर बनवले आहेत. ‘बडे मियाँ छोटे मियाँ’ ईदच्या मुहूर्तावर 9 एप्रिलला प्रदर्शित होणार आहे.