पृथ्वी शॉने तुफानी शतक झळकावून केला मोठा विक्रम, भारतीय क्रिकेटच्या इतिहासात हे प्रथमच घडले

मुंबईकडून खेळत असलेल्या पृथ्वी शॉने जवळपास 100 च्या स्ट्राईक रेटने आपले 13 वे प्रथम श्रेणी शतक पूर्ण केले. पहिल्या दिवशी उपाहारापूर्वीच शॉने आपले शतक पूर्ण केले. या खेळीत त्याने 185 चेंडूत 159 धावा केल्या. त्याच्या या स्फोटक खेळीत 18 चौकार आणि 3 षटकारांचा समावेश होता. शॉ आता रणजी ट्रॉफी सामन्याच्या पहिल्या सत्रात दोनदा शतके झळकावणारा पहिला फलंदाज ठरला आहे. यापूर्वी त्याने 2023 मध्ये आसामविरुद्धही अशीच कामगिरी केली होती. बराच काळ खेळापासून दूर असलेल्या शॉने क्रिकेटमध्ये दमदार पुनरागमन केले आहे.

गेल्या वर्षी ऑगस्टमध्ये नॉर्थम्प्टनशायरकडून काऊंटी क्रिकेट खेळताना शॉच्या गुडघ्याला दुखापत झाली होती आणि तेव्हापासून तो राष्ट्रीय क्रिकेट अकादमीमध्ये बरा होत होता. शॉने रणजी ट्रॉफीमध्ये मुंबईच्या शेवटच्या सामन्यात पुनरागमन केले. त्यानंतर बंगालविरुद्ध 35 धावांची इनिंग खेळून तो बाद झाला.

दुखापत होण्यापूर्वी शॉने काउंटी क्रिकेटमधील वनडे चषकात एकाच सामन्यात 244 धावा केल्या होत्या. त्याने डरहमविरुद्ध 125 धावांची नाबाद खेळीही खेळली होती. शॉला आयपीएल 2024 साठी दिल्ली कॅपिटल्स संघाने कायम ठेवले आहे आणि चांगली बातमी अशी आहे की तो आयपीएलमध्ये खेळण्यासाठी पूर्णपणे तंदुरुस्त आहे.