2024 हे वर्ष भारतीय क्रिकेट संघासाठी खूप महत्त्वाचे असणार आहे. यंदा भारताला T20 विश्वचषक खेळायचा आहे. या विश्वचषकात टीम इंडियाला वर्षानुवर्षे सुरू असलेला दुष्काळ संपवायचा आहे. 2007 मध्ये भारताने T20 विश्वचषक जिंकला, मात्र त्यानंतर भारत पुन्हा T20 चॅम्पियन होऊ शकला नाही. यावेळी टीम इंडिया विजेतेपदाचा दुष्काळ संपवण्याचा प्रयत्न करणार आहे. हा विश्वचषक अमेरिका आणि वेस्ट इंडिजमध्ये खेळवला जाणार आहे. अजित आगरकर याच्या अध्यक्षतेखालील वरिष्ठ निवड समितीने यासाठी नियोजन सुरू केले आहे. यासाठी निवड समिती 30 खेळाडूंवर लक्ष ठेवून आहे.
रोहित शर्मा आणि विराट कोहली हे दोघेही टी-20 विश्वचषक स्पर्धेसाठी तयार असल्यामुळे भारतीय निवड समितीला या विश्वचषकासाठी आपला प्लॅन तयार करावा लागेल. दोघांनाही या विश्वचषकाचा भाग व्हायचे आहे. रोहित आणि विराट या दोघांनी गेल्या वर्षी खेळल्या गेलेल्या T20 विश्वचषकानंतर एकही T20 आंतरराष्ट्रीय सामना खेळलेला नाही, पण वृत्तसंस्था पीटीआयच्या म्हणण्यानुसार ते दोघेही पुढचा T20 विश्वचषक खेळण्यास उत्सुक आहेत.
यावेळी निवड समितीच्या नजरा यावर्षी होणाऱ्या इंडियन प्रीमियर लीगच्या (आयपीएल) हंगामावर आहेत. पीटीआयच्या वृत्तानुसार, निवड समितीने 30 खेळाडूंची निवड केली असून, आयपीएलदरम्यान त्यांच्यावर नजर ठेवण्यात येणार आहे. या 30 खेळाडूंमधूनच पुढील टी-20 विश्वचषकासाठी संघ तयार केला जाईल, असे मानले जात आहे. आयपीएलमधील खेळाडूंचा फॉर्म त्यांचे भविष्य ठरवेल. फॉर्म खराब असेल, तर खेळाडू बाहेर जाऊ शकतो आणि फॉर्म चांगला असेल, तर तो संघात येण्याचा दावेदार होऊ शकतो. याशिवाय 11 जानेवारीपासून अफगाणिस्तानविरुद्ध होणाऱ्या टी-20 मालिकेवरही निवड समितीची नजर आहे.
आयपीएलमधील कामगिरीच्या आधारावर निवड समिती याआधीही टी-२० साठी संघ निवडत आहे. 2021 मध्ये UAE मध्ये खेळल्या गेलेल्या T20 विश्वचषकात अनेक खेळाडू केवळ त्यांच्या IPL कामगिरीच्या जोरावर संघात आले. त्यापैकी एक नाव होते वरुण चक्रवर्ती. त्याच्याशिवाय लेगस्पिनर राहुल चहरही संघात आला, पण या दोघांनीही कोणताही प्रभाव सोडला नाही. वरुण त्याच्या गूढ फिरकीसाठी ओळखला जातो, पण धावा रोखण्यात आणि विकेट घेण्यात तो यशस्वी ठरला नाही. त्या विश्वचषकात भारतीय संघ उपांत्य फेरीपर्यंत पोहोचू शकला नव्हता. यावेळीही आयपीएलच्या आधारेच खेळाडूंची निवड झाली, तर 2021 मध्ये जी चूक झाली तीच चूक निवड समितीकडून होण्याची भीती आहे.