भारतीय क्रिकेट नियामक मंडळाने 2008 मध्ये एक पाऊल उचलले होते, ज्याने संपूर्ण क्रिकेट जगत बदलून टाकले होते. ही ती सुरुवात होती, ज्यावर आज संपूर्ण जग चालत आहे. बीसीसीआयने आयपीएल सुरू केले आणि तेव्हापासून ही लीग जगभरात लोकप्रिय झाली. प्रत्येक क्रिकेटपटूला या लीगमध्ये खेळायचे असते. आयपीएलच्या धर्तीवर इतर देशांनीही टी-20 लीग सुरू केल्या, पण आयपीएलची बरोबरी कुणालाच करता आली नाही. इतर लीगच्या तुलनेत खेळाडूही आयपीएलला प्राधान्य देतात. याला कारण पैसा आहे. आयपीएल ही क्रिकेटची जगातील सर्वात श्रीमंत लीग आहे. यामध्ये खेळाडूंवर मोठ्या प्रमाणात पैशांचा वर्षाव केला जातो.
पण या लीगमध्ये पैसे कसे वाटले जातात, हे तुम्हाला माहिती आहे का? खेळाडूंना कसे आणि किती पैसे मिळतात? आयपीएल लिलावाबद्दल सर्वांना माहिती आहे. हा लिलाव टीव्हीवर दाखवला जातो आणि खेळाडूला किती पैसे मिळतात, हे सगळ्यांनाच माहीत असते. पण हे पैसे खेळाडूपर्यंत कसे पोहोचतात आणि दुखापत झाल्यास खेळाडूला किती पैसे मिळतात. हे सर्व आम्ही तुम्हाला सांगतो.
आयपीएल लिलावात खेळाडूंना दिलेली रक्कम हा त्यांचा आयपीएल पगार आहे. मागील लिलावात सॅम करनला पंजाब किंग्जने 18.5 कोटी रुपयांना विकत घेतले होते. सॅम कुरनचा हा आयपीएल पगार होता. त्याला मिळणारी ही वार्षिक रक्कम होती. आता जर पंजाबने त्याच्यासोबत तीन वर्षांचा करार केला, तर करणला दरवर्षी 18.5 कोटी रुपये मिळतील. कराराला मुदतवाढ दिली, तरी रक्कम तेवढीच राहणार आहे.
अशा स्थितीत अनेकांच्या मनात प्रश्न पडतो की, खेळाडू जखमी झाला किंवा सीझन मध्येच सोडून गेला, तर त्या खेळाडूला किती पैसे मिळतात? या प्रकरणात गणित स्पष्ट आहे. जर खेळाडू संपूर्ण हंगामासाठी उपलब्ध असेल, तर त्याला पूर्ण रक्कम मिळते, मग तो कितीही सामने खेळला तरी. हंगामापूर्वी कोणत्याही कारणास्तव खेळाडूने आपले नाव मागे घेतल्यास त्याला एक पैसाही मिळत नाही. जर खेळाडू हंगामातील काही सामन्यांसाठी उपलब्ध असेल, तर त्याला प्रो रेटा आधारावर वेतन दिले जाते, ज्यानंतर 10 टक्के रिटेनर रक्कम समाविष्ट केले जाते. हंगामाच्या मध्यात खेळाडू जखमी झाल्यास त्याचा वैद्यकीय खर्च फ्रँचायझीला करावा लागतो.
खेळाडूंना किती पैसे आणि कधी मिळतात याबाबत प्रत्येक फ्रँचायझीची पद्धत वेगळी असते. सर्व फ्रँचायझी एकाच वेळी खेळाडूला संपूर्ण रक्कम देत नाहीत. काही फ्रँचायझी शिबिराच्या वेळी खेळाडूंना अर्धी रक्कम देतात. काही जण टूर्नामेंट सुरू होण्यापूर्वी 50 टक्के रक्कम देतात. काही फ्रँचायझी टूर्नामेंट सुरू होण्याच्या एक आठवडा आधी 15 टक्के पगार देतात, 65 टक्के स्पर्धेदरम्यान आणि 20 टक्के नंतर.