एड्स या आजाराबाबत लोकांना जागरूक करण्यासाठी दरवर्षी 1 डिसेंबर रोजी जागतिक एड्स दिन साजरा केला जातो. पण आजही या आजाराबाबत लोकांमध्ये माहितीचा अभाव आहे. सर्वात मोठा गोंधळ हा आहे की लोक एड्स आणि एचआयव्हीला समान मानतात, परंतु तसे नाही. एचआयव्ही हा एक विषाणू आहे, ज्यामुळे एड्स (अक्वायर्ड इम्युनोडेफिशियन्सी सिंड्रोम) होतो. एड्स हा एचआयव्ही विषाणूचा शेवटचा टप्पा आहे. एड्स झाल्यानंतर व्यक्तीची रोगप्रतिकारक शक्ती योग्यरित्या कार्य करू शकत नाही. अनेक प्रकरणांमध्ये ते अपयशी ठरते आणि त्यामुळे व्यक्तीचा मृत्यू होऊ शकतो, परंतु एचआयव्हीची लागण झालेल्या प्रत्येक व्यक्तीला एड्स होतो, असे नाही. एचआयव्ही संसर्ग म्हणजे मृत्यू हे देखील आवश्यक नाही.
1 डिसेंबर रोजी जागतिक एड्स दिनानिमित्त, आपल्यासाठी एचआयव्ही आणि एड्सबद्दल तपशीलवार जाणून घेणे महत्वाचे आहे. याबद्दल तज्ज्ञांकडून जाणून घेऊया.
एचआयव्हीचे औषध आहे अस्तित्वात
एचआयव्ही हा एक विषाणू आहे, जो या विषाणूने संक्रमित झालेल्या एका व्यक्तीकडून दुसऱ्या व्यक्तीमध्ये पसरतो. रक्त संक्रमण, असुरक्षित लैंगिक संबंध ही या विषाणूच्या प्रसाराची प्रमुख कारणे आहेत. एचआयव्ही ग्रस्त व्यक्ती देखील सामान्य जीवन जगू शकते. एचआयव्ही रुग्णांना अँटी रेट्रो व्हायरल औषधे दिली जातात. ही औषधे एचआयव्ही विषाणूला एड्स होण्यापासून रोखतात. एखाद्याला एचआयव्हीची लागण झाली असली, तरी या औषधांच्या मदतीने विषाणू नियंत्रणात राहतो आणि कोणताही गंभीर धोका नसतो.
का घातक आहे एड्स?
उपचाराअभावी एड्स हा आजार जीवघेणा मानला जात होता, पण ARTS ची औषधे आल्यापासून हा आजार आटोक्यात आणण्यास मदत होत आहे. आता माणसाला एड्स झाला, तर तो मरतो असे नाही. जर एखाद्या व्यक्तीची जीवनशैली चांगली असेल आणि ती वेळेवर औषधे घेत असेल, तर तो देखील संसर्ग नसलेल्या व्यक्तीप्रमाणे सामान्य जीवन जगू शकतो.
एचआयव्हीचे एड्समध्ये रूपांतर होण्यासाठी किती वेळ लागतो?
एचआयव्हीचा विषाणू एड्समध्ये विकसित होण्यासाठी साधारणपणे दहा वर्षांहून अधिक कालावधी लागतो, परंतु एचआयव्ही वेळेवर आढळून आला आणि उपचार सुरू केले, तर एड्सचा धोका कमी राहतो. ज्या लोकांची जीवनशैली चांगली नाही आणि त्यांना अनेक चुकीच्या गोष्टींचे व्यसन लागले आहे, त्यांच्यामध्ये एचआयव्ही विषाणूचा एड्समध्ये विकास होण्यास काही वर्षे लागतात आणि अशा लोकांमध्ये मृत्यूचा धोका जास्त असतो.
काय आहेत एचआयव्हीची लक्षणे ?
- फ्लू सारखी लक्षणे 2 ते 4 आठवड्यांच्या आत
- ताप, डोकेदुखी, सतत स्नायू दुखणे
- तोंडावर फोड येणे, वजन कमी होणे
- चेहऱ्यावर जखमा