टीम इंडिया 12 वर्षांची प्रतीक्षा संपवण्याच्या अगदी जवळ आहे. ही प्रतीक्षा संपण्यास 48 तासांपेक्षा कमी कालावधी शिल्लक आहे. रविवारी 19 नोव्हेंबर रोजी अहमदाबादच्या नरेंद्र मोदी स्टेडियमवर भारत आणि ऑस्ट्रेलिया यांच्यातील विश्वचषक 2023 च्या अंतिम फेरीत याचा निर्णय होईल. रोहित शर्माच्या नेतृत्वाखाली टीम इंडिया जबरदस्त फॉर्ममध्ये आहे आणि त्याला फक्त ऑस्ट्रेलियाचा अडथळा पार करायचा आहे. मात्र, विजय निश्चित करण्यासाठी अहमदाबादची खेळपट्टी कशी असेल आणि त्यावर किती धावा करता येतील याकडे सर्वांच्या नजरा लागल्या आहेत.
रविवारी नरेंद्र मोदी स्टेडियमवर जागतिक क्रिकेटमधील सर्वात मोठा सामना होणार आहे. टीम इंडियाचा कर्णधार रोहित शर्मा आणि प्रशिक्षक राहुल द्रविड यांनी शुक्रवारी 17 नोव्हेंबरला स्टेडियम गाठून खेळपट्टीचा आढावा घेतला. आता ही खेळपट्टी कशी आहे याबाबत उत्सुकता आहे. पीटीआय या वृत्तसंस्थेच्या वृत्तानुसार, अंतिम सामन्यासाठी नवीन खेळपट्टीचा वापर केला जाईल की आधीच वापरलेल्या खेळपट्टीवर हा सामना खेळवला जाईल, हे सध्या स्पष्ट झालेले नाही.
अंतिम सामन्यासाठी खेळपट्टी तयार करण्यासाठी, मैदानावरील कर्मचाऱ्यांनी बीसीसीआयचे मुख्य क्युरेटर आशिष भौमिक आणि त्यांचे उप तपोश चॅटर्जी यांच्या देखरेखीखाली खेळपट्टीवर काम केले. त्यांच्या व्यतिरिक्त बीसीसीआयचे सरव्यवस्थापक (देशांतर्गत क्रिकेट) अॅबी कुरुविला हे देखील यावेळी उपस्थित होते. ही खेळपट्टी काळ्या मातीपासून बनलेली आहे, जी साधारणपणे संथ असते. अहवालानुसार, खेळपट्टीवर जड रोलर्सचा वापर करण्यात आला होता, यावरून असे दिसून येते की अंतिम सामन्याच्या दिवशी खेळपट्टी संथ असू शकते. म्हणजे स्फोटक फलंदाजी आणि धावा काढण्याची शक्यता कमीच आहे.
आता या खेळपट्टीवर प्रथम फलंदाजी करताना विजयासाठी किती धावसंख्या पुरेशी ठरतील, हा प्रश्न आहे. एका स्थानिक क्युरेटरने याचे उत्तर दिले आहे. पीटीआयच्या वृत्तात गुजरात क्रिकेट असोसिएशनच्या पिच क्युरेटरचा हवाला देत असे म्हटले आहे की येथे थोडी मोठी धावसंख्या बनवता येईल, परंतु सतत हार्ड हिटिंग शक्य होणार नाही. या क्युरेटरने सांगितले की प्रथम फलंदाजी करताना 315 धावा झाल्या, तर त्याचा बचाव केला जाऊ शकतो, कारण पाठलाग करणे अजिबात सोपे नाही.
या मैदानावर 5 ऑक्टोबरपासून स्पर्धेला सुरुवात झाली, ज्यामध्ये न्यूझीलंडने इंग्लंडला हरवून शानदार सुरुवात केली. यानंतर टीम इंडियानेही या मैदानावर पाकिस्तानचा एकतर्फी 7 गडी राखून पराभव करत आपले कौशल्य दाखवून दिले. यानंतरही मोदी स्टेडियमवर आणखी दोन सामने झाले, मात्र यापैकी एकाही सामन्यात 300 चा टप्पा पार करता आला नाही. येथे खेळल्या गेलेल्या 4 सामन्यांमध्ये सर्वात मोठी धावसंख्या 286 धावांची होती, जी ऑस्ट्रेलियाने इंग्लंडविरुद्ध केली आणि सामना 33 धावांनी जिंकला.