विश्वचषक-2023 मधील पाकिस्तान क्रिकेट संघाच्या खराब कामगिरीचा परिणाम दिसू लागला आहे. मुख्य निवडकर्ता इंझमाम उल हक याने आपल्या पदाचा राजीनामा दिला आहे. या विश्वचषकात बाबर आझमच्या संघाची कामगिरी अत्यंत खराब झाली आहे. संघाने 6 सामने खेळले असून केवळ 2 सामने जिंकले आहेत. गेल्या 4 सामन्यात त्यांना पराभव पत्करावा लागला आहे. मंगळवारी पाकिस्तान संघाचा बांगलादेशशी सामना आहे. जर त्यांनी हा सामना गमावला तर ते उपांत्य फेरीच्या शर्यतीतून बाहेर पडतील.
पाकिस्तान मीडियानुसार, इंझमामने संघाच्या खराब कामगिरीमुळे राजीनामा दिलेला नाही. हितसंबंधांच्या संघर्षामुळे त्याने पदाचा राजीनामा दिला आहे. खरे तर हितसंबंधांच्या संघर्षाचे प्रकरण सोशल मीडियावर समोर आले होते. आपल्या स्पष्टीकरणात इंझमाम म्हणाला, लोक संशोधनाशिवाय बोलतात. माझ्यावर प्रश्न उपस्थित केले गेले, त्यामुळे मी राजीनामा दिला, तर बरे होईल असे मी ठरवले. इंझमाम म्हणाला की, पीसीबीला माझी चौकशी करायची असेल, तर मी उपलब्ध आहे. लोक कोणत्याही पुराव्याशिवाय माझ्याबद्दल बोलत आहेत, पुरावा असेल, तर आणा. मी पीसीबीला तसे करण्यास सांगितले आहे.
तो म्हणाला की, खेळाडू एजंट कंपनीशी माझा कोणताही संबंध नाही, अशा आरोपांमुळे मी दु:खी आहे. तो पुढे म्हणाला की, परिस्थिती सामान्य झाल्यावर मी पीसीबीच्या अधिकाऱ्यांसोबत बसेन. पाच सदस्यीय समिती स्थापन करण्यात आल्याचे मला फोनवरून सांगण्यात आले, त्यामुळे चौकशी सुरू असतानाच मी राजीनामा दिला, तर बरे होईल, असे बोर्डाला सांगितले. जेव्हा सर्वकाही सामान्य होईल, तेव्हा मी पीसीबीसोबत बसेन.
इंझमाम-उल-हकने आशिया कप 2023 च्या मध्यात मुख्य निवडकर्ता पदाचा राजीनामा देण्याची धमकी दिली होती. त्यावेळी त्याचा पीसीबीशी वाद सुरू होता. त्याला पाकिस्तानी खेळाडूंना परदेशी टी-20 फ्रँचायझी लीगमध्ये सहभागी होण्यासाठी ना हरकत प्रमाणपत्र देण्याचा पूर्ण अधिकार हवा होता. त्याची विनंती पाकिस्तान क्रिकेट बोर्डाने (पीसीबी) फेटाळून लावली आणि त्यामुळे महान फलंदाजाने आपल्या पदाचा राजीनामा देण्याची धमकी दिली.
इंझमामच्या धमकीनंतर, पीसीबी पाकिस्तानचा माजी कर्णधार मिसबाह-उल-हक किंवा नदीम खान यांना नवीन मुख्य निवडकर्ता म्हणून नियुक्त करण्याचा विचार करत आहे. मात्र, दोन्ही पक्षांमध्ये परस्पर सामंजस्य करार होऊन राजीनामे पुढे ढकलण्यात आले. इंझमामला 7 ऑगस्ट 2023 रोजी मुख्य निवडकर्ता बनवण्यात आले. माजी पाकिस्तानी कर्णधाराने PKR 20 लाख पगारासह दीर्घ कराराची मागणी केली आणि आपली मागणी पूर्ण न झाल्यास राजीनामा देण्याची धमकी दिली.
पीसीबीने त्यांच्या मागण्या पूर्ण केल्या आणि 31 ऑगस्ट रोजी करार करण्यात आला. पाकिस्तानचा मुख्य निवडकर्ता म्हणून इंझमाम-उल-हक याची ही दुसरी टर्म आहे. यापूर्वी 2016 ते 2019 या काळात त्याने हे पद भूषवले होते.