बीसीसीआयच्या वरिष्ठ निवड समितीने सोमवारी ऑस्ट्रेलियाविरुद्ध खेळल्या जाणाऱ्या तीन सामन्यांच्या वनडे मालिकेसाठी संघाची घोषणा केली. निवड समितीने तीन सामन्यांसाठी दोन संघांची निवड केली आहे. पहिल्या दोन सामन्यांसाठी, अजित आगरकर यांच्या अध्यक्षतेखालील समितीने एक वेगळा संघ निवडला आहे, ज्याचे कर्णधारपद केएल राहुलकडे सोपवण्यात आले आहे. तिसऱ्या आणि शेवटच्या सामन्यासाठी स्वतंत्र संघ निवडण्यात आला असून या संघाची कमान रोहित शर्माच्या हाती आहे. कर्णधार रोहित आणि आगरकर यांनी आभासी पत्रकार परिषदेत संघाची घोषणा केली, तेव्हा काही आश्चर्यकारक निर्णय समोर आले. या संघ निवडीतील महत्त्वाच्या गोष्टी कोणत्या होत्या ते आम्ही तुम्हाला सांगतो.
टीम सिलेक्शनच्या मोठ्या गोष्टींकडे जाणून घेण्यापूर्वी, आम्ही तुम्हाला सांगतो की भारत आणि ऑस्ट्रेलिया यांच्यातील तीन सामन्यांची वनडे मालिका 22 सप्टेंबरपासून मोहालीमध्ये सुरू होत आहे. दुसरा सामना 24 सप्टेंबरला इंदूरमध्ये होणार आहे. तिसरा सामना 27 सप्टेंबर रोजी राजकोटमध्ये होणार आहे.
निवड समितीने पहिल्या दोन सामन्यांसाठी वरिष्ठ खेळाडूंना विश्रांती दिली असून त्यात रोहित शर्मा, विराट कोहली, हार्दिक पांड्या, कुलदीप यादव यांच्या नावांचा समावेश आहे. पहिल्या दोन सामन्यांमध्ये संघाचे नेतृत्व केएल राहुलकडे सोपवण्यात आले असून रवींद्र जडेजाला उपकर्णधारपद देण्यात आले आहे. तिसऱ्या सामन्यात रोहित कर्णधार आणि पांड्या उपकर्णधार आहे.
रविचंद्रन अश्विनचे पुनरागमन झाले आहे. आशिया कप-2023 मध्ये अक्षर पटेलला दुखापत झाली होती आणि त्यामुळे तो फायनल खेळू शकला नाही. याच कारणामुळे रविचंद्रन अश्विनची ऑस्ट्रेलियाविरुद्ध निवड करण्यात आली आहे. अश्विनचा अनुभव संघाला उपयोगी पडणार असून या मालिकेत अश्विन कुठे उभा आहे, हे कळेल असे रोहितने म्हटले आहे.
या पत्रकार परिषदेत मुख्य निवडकर्ता अजित आगरकर याने अक्षर पटेलच्या फिटनेसबाबत अपडेटही दिले आहे. आगरकर म्हणाला की, अक्षर विश्वचषक संघात आहे आणि तो अद्याप बाहेर नाही. हा डावखुरा अष्टपैलू खेळाडू तिसऱ्या वनडेपूर्वी तंदुरुस्त होईल, अशी आशा त्याने व्यक्त केली आहे. बांगलादेशविरुद्ध आशिया चषकात अक्षर दुखापतग्रस्त झाल्याने तो खेळू शकला नाही. यासोबतच त्याच्या विश्वचषक खेळण्याबाबतही परिस्थिती स्पष्ट झालेली नाही. जर तो तंदुरुस्त नसेल, तर अश्विन किंवा वॉशिंग्टन सुंदरची संघात निवड होऊ शकते, असे आगरकरने म्हटले आहे.
प्रदीर्घ कालावधीनंतर आशिया कपमध्ये पुनरागमन करणारा श्रेयस अय्यर तिसऱ्या सामन्यात दुखापतग्रस्त झाला होता. या कारणास्तव तो आणखी सामने खेळला नाही. बांगलादेशविरुद्धच्या सामन्याच्या वेळी बीसीसीआयने आपल्या प्रकृतीत सुधारणा होत असल्याचे सांगितले होते. आशिया कप फायनलपूर्वी रोहितने सांगितले होते की, अय्यरने बहुतांश पॅरामीटर्स पूर्ण केले आहेत, मात्र काही गोष्टी शिल्लक आहेत. अय्यरला विश्वचषकापर्यंत तंदुरुस्त होण्यात कोणतीही अडचण येणार नाही, असे तो म्हणाला होता. ऑस्ट्रेलियाविरुद्धच्या तिन्ही सामन्यांमध्ये अय्यरला स्थान मिळाले आहे, याचा अर्थ त्याचा फिटनेस चांगला आहे, ही संघासाठी चांगली गोष्ट आहे.
ऑस्ट्रेलिया मालिकेसाठी टीम इंडिया:-
पहिल्या दोन सामन्यांसाठी टीम इंडिया: केएल राहुल (कर्णधार), रवींद्र जडेजा (उपकर्णधार), शुभमन गिल, रुतुराज गायकवाड, श्रेयस अय्यर, इशान किशन, सूर्यकुमार यादव, शार्दुल ठाकूर, जसप्रीत बुमराह, मोहम्मद सिराज, मोहम्मद शमी, तिलक वर्मा, प्रसिद्ध कृष्ण, रविचंद्रन अश्विन, वॉशिंग्टन सुंदर
तिसऱ्या वनडेसाठी टीम इंडिया: रोहित शर्मा (कर्णधार), हार्दिक पंड्या (उपकर्णधार), शुभमन गिल, विराट कोहली, श्रेयस अय्यर, सूर्यकुमार यादव, केएल राहुल (यष्टीरक्षक), इशान किशन (यष्टीरक्षक), रवींद्र जडेजा, शार्दुल ठाकूर , अक्षर पटेल, वॉशिंग्टन सुंदर, कुलदीप यादव, रविचंद्रन अश्विन, जसप्रीत बुमराह, मोहम्मद शमी, मोहम्मद सिराज.