ICMR (इंडियन कौन्सिल ऑफ मेडिकल रिसर्च) ने निपाह व्हायरसपासून बचाव करण्यासाठी लस तयार करण्याची तयारी सुरू केली आहे. येत्या 100 दिवसांत ही लस तयार करण्याचे नियोजन करण्यात आले आहे. लस तयार करण्यासाठी भागीदारांचा शोध घेतला जात आहे. ICMR (इंडियन कौन्सिल ऑफ मेडिकल रिसर्च) चे DG राजीव बहल म्हणाले की, देशातील कोणत्याही नवीन आजारावर 100 दिवसांत लस तयार करण्याचा संकल्प केला आहे.
आत्तापर्यंत केरळमध्ये निपाह व्हायरसची सहा प्रकरणे समोर आली असून, दोन संक्रमित लोकांचा मृत्यू झाला आहे. या वाढत्या धोक्याबद्दल ICMR सतर्क झाली आहे. निपाह व्हायरसची लस बनवण्याची तयारी सुरू केली आहे, याशिवाय डेंग्यू आणि टीबीच्या लसींवरही काम सुरू आहे.
ते म्हणाले की निपाहमध्ये संक्रमित लोकांचा मृत्यू दर खूप जास्त आहे (40 ते 70 टक्के दरम्यान) तर कोविडमध्ये मृत्यू दर 2-3 टक्के होता. कोझिकोडमध्ये निपाह विषाणूच्या ताज्या प्रकरणाची पुष्टी झाली असून, राज्यातील एकूण संक्रमित लोकांची संख्या सहा झाली आहे, त्यापैकी दोन आधीच मरण पावले आहेत.
ICMR चे DG म्हणाले की आता निपाह व्हायरसच्या संसर्गाची तपासणी केरळच्या BSL III लॅबमध्ये केली जात आहे. आता निपाहचा नमुना एनआयव्ही पुणे येथे पाठवावा लागणार नाही. सरकारने निपाह बाधित लोकांसाठी ऑस्ट्रेलियातून मोनोक्लोनल अँटीबॉडीजचे आणखी 20 डोस मागवले आहेत.
ते म्हणाले की सध्या त्यांच्याकडे 10 रुग्णांसाठी मोनोक्लोनल अँटीबॉडी उपलब्ध आहेत. तथापि, मोनोक्लोनल ऍन्टीबॉडीज किती अचूक आहेत, हे निर्धारित करण्यासाठी चाचणी सुरू आहे. मोनोक्लोनल अँटीबॉडीज भारतात अद्याप कोणालाही दिलेले नाहीत.
ते म्हणाले, आम्ही कोविड दरम्यान डीएनए लस, एमआरएनए लस, एडेनोव्हायरल व्हेक्टर लस, प्रोटीन सब्यूनिट लस आणि नाकातील लस यासारख्या विविध प्लॅटफॉर्मवर लस विकसित केल्या आहेत आणि आम्ही या वैविध्यपूर्ण प्लॅटफॉर्मचा वापर निपाह संसर्गासारख्या आजारांविरुद्ध नवीन लस विकसित करण्यासाठी करत आहोत.
तथापि, अँटीबॉडीजच्या वापराचा निर्णय केवळ केरळ सरकारवरच नाही, तर डॉक्टर आणि रूग्णांच्या कुटुंबांवरही अवलंबून आहे, असे ते म्हणाले. केरळमध्ये नेमका कोणता प्रकार प्रचलित आहे, हे जाणून घेण्यासाठी पुण्यातील ICMR ची नॅशनल इन्स्टिट्यूट ऑफ व्हायरोलॉजी व्हायरसचे संपूर्ण जीनोम सिक्वेन्सिंग करत आहे.
दरम्यान, ते म्हणाले की जिल्ह्यात चाचणी सक्षम करण्यासाठी मोबाईल BSL 3 प्रयोगशाळा पाठविण्यात आली आहे, जिथे नमुन्यांची चाचणी आधीच सुरू झाली आहे. बहल म्हणाले की, उच्च मृत्युदर लक्षात घेता, खबरदारी घेणे हा सर्वोत्तम पर्याय आहे.
त्यांनी लोकांना सामाजिक अंतर पाळण्याचा, मास्क घालण्याचा आणि वटवाघळांच्या संपर्कात आलेल्या कच्च्या अन्नापासून दूर राहण्याचा सल्ला दिला. तंत्रज्ञान-हस्तांतरण उपक्रमाचा भाग म्हणून यूएसमध्ये विकसित केलेली अँटीबॉडी ऑस्ट्रेलियातील विद्यापीठासोबत सामायिक केली गेली.
ICMR DG म्हणाले की, केरळमधील प्रकरणांमध्ये, भारताने निपाह विषाणू संसर्गाच्या उपचारांसाठी मोनोक्लोनल अँटीबॉडीजचे आणखी 20 डोस खरेदी करण्यासाठी ऑस्ट्रेलियाशी संपर्क साधला आहे.