लग्नाच्या चर्चेत टेबलवर दिलेले ‘नमकीन’ असो किंवा मित्रांच्या रात्रीच्या पार्ट्यांमध्ये खाल्लेला ‘स्नॅक’ असो, या दोन्ही ठिकाणी एका ब्रँडचे नाव बहुतेकांच्या जिभेवर असते, ते म्हणजे ‘हल्दीराम’. अनेक वर्षांच्या विश्वासानंतर, आज हा भारतातील स्नॅक्सचा सर्वात मोठा ब्रँड बनला आहे. आता त्यात आणखी एक विश्वासाचे प्रतीक म्हणजे ‘टाटा ग्रुप’ जोडला जाऊ शकतो.
टाटा समूह स्नॅक्स ब्रँड हल्दीराममधील 51 टक्के हिस्सा खरेदी करण्याच्या योजनेवर काम करत आहे. हा करार पूर्ण झाल्यास टाटा समूहाची किरकोळ बाजारात रिलायन्स रिटेल आणि पेप्सी सारख्या बड्या कंपन्यांशी थेट स्पर्धा होईल. मात्र, हल्दीरामच्या मूल्यांकनावर टाटा खूश नाहीत.
सूत्रांच्या हवाल्याने, रॉयटर्सने वृत्त दिले आहे की टाटा समूह हल्दीराम ब्रँडच्या 10 अब्ज डॉलरच्या मूल्यांकनावर खूश नाही. दुसरीकडे, हल्दीराम 10 टक्के स्टेक विकण्यासाठी दुसऱ्या गुंतवणूकदाराशी बोलणी करत आहेत. ही खाजगी इक्विटी फर्म बेन कॅपिटल आहे.
टाटा समूहाची टाटा कंझ्युमर प्रॉडक्ट्स कंपनी हल्दीरामच्या अधिग्रहणासाठी बोलणी करत आहे. टाटा समूहाची ही कंपनी यूकेच्या लोकप्रिय चहा-ब्रँड टेटलीच्या मालकीची आहे. हीच कंपनी भारतातील स्टॅबक्सचा व्यवसायही पाहते. टाटा समूहाचे म्हणणे आहे की हल्दीरामची वार्षिक उलाढाल $1.5 बिलियन आहे. अशा परिस्थितीत 10 अब्ज डॉलर्सचे मूल्यांकन थोडे विचित्र आहे.
ही बातमी समोर आल्यानंतर टाटा कंझ्युमरच्या शेअरच्या किमतीत 3 टक्क्यांपर्यंत वाढ झाली आहे. टाटा समूह हल्दीराममधील संपूर्ण 51 टक्के हिस्सा खरेदी करण्यास उत्सुक आहे. जेणेकरून कंपनीकडे निर्णायक अधिकार असतील.
टाटा कंझ्युमरच्या प्रवक्त्याने याबाबत कोणतीही प्रतिक्रिया देण्यास नकार दिला आहे. त्याचवेळी हल्दीरामचे सीईओ कृष्ण कुमार चुटानी आणि खाजगी इक्विटी फर्म बेन कॅपिटल यांनीही काहीही बोलण्यास नकार दिला आहे.
1937 मध्ये हल्दीरामची सुरुवात झाली. कंपनीच्या क्रिस्पी भुजियाने लोकांची मने जिंकली होती. हल्दीराम ब्रँड हा कौटुंबिक व्यवसाय आहे. देशभरातील पान शॉपवर 5 रुपयांच्या विक्री पॅकेटपासून ते मोठ्या स्टोअरमध्ये उपलब्ध आहे.
भारताच्या $6.3 अब्ज नमकीन मार्केटमध्ये त्याचा वाटा सुमारे 13 टक्के आहे. पेप्सीच्या ‘लेज’ ब्रँडच्या चिप्सचाही तेवढाच वाटा आहे. टाटा समूह सध्या असे कोणतेही उत्पादन थेट विकत नाही, त्यामुळे हल्दीराम खरेदी केल्याने टाटा समूहाची थेट बाजारपेठेत पोहोच होईल. त्याचबरोबर रिटेल क्षेत्रातील वेगाने वाढणाऱ्या रिलायन्स रिटेलशी स्पर्धा करण्यासाठीही ही रणनीती उपयुक्त ठरेल.