स्वतःचे घर असावे असे आपल्यापैकी प्रत्येकाचे स्वप्न असते, पण प्रत्येकाचे स्वप्न पूर्ण होत नाही. आजकाल घर बांधणे किंवा विकत घेणे इतके महाग झाले आहे की, लोकांना इच्छा असूनही स्वतःचे घर घेणे शक्य होत नाही. काही महिन्यांपूर्वी एक बातमी आली होती की लंडनमध्ये 40 बेडरुम असलेले असे घर आहे, ज्याची किंमत सुमारे 25 अब्ज रुपये आहे, परंतु आता अशा घराची चर्चा आहे, ज्याची किंमत इतकी कमी आहे की एखादा भिकारी देखील ते खरेदी करू शकेल. जगातील सर्वात स्वस्त घर म्हणून या घराचे वर्णन केले जात आहे.
हे घर अमेरिकेच्या मिशिगनमधील पॉन्टियाकमध्ये आहे, ज्याची किंमत फक्त एक डॉलर म्हणजेच 82 रुपये आहे. अशावेळी लोकांना 10 विटाही मिळणार नाहीत, मग घर कुठून बांधणार, पण तरीही हे घर इतक्या कमी किमतीत उपलब्ध आहे. तुम्हाला वाटत असेल की हे घर खूप छोटे असेल, पण तसे अजिबात नाही. हे घर प्रत्यक्षात दोन बेडरूम्स असलेला बंगला आहे.
लॅडबायबल नावाच्या वेबसाइटच्या रिपोर्टनुसार, रिअल इस्टेट एजंट क्रिस्टोफर ह्यूबेलने सांगितले की, या घराची किंमत ऑनलाइन शेअर होताच, त्याला लोकांचे कॉल येऊ लागले. त्याला शेकडो फोन कॉल्स, शेकडो मजकूर आणि शेकडो ईमेल्स आले आहेत, ज्यात जगातील सर्वात स्वस्त घर खरेदी करण्यात रस आहे.
क्रिस्टोफरने सांगितले की, हे घर 1956 मध्ये बांधले गेले आणि अनेक वर्षांनी ते दुसऱ्याला विकले गेले. सध्या हे घर जवळपास 20 वर्षांपासून एका व्यक्तीकडे आहे. 2004 साली त्यांनी ते विकत घेतले होते आणि नंतर भाड्याने दिले होते. 2011 मध्ये त्यांनी हे घर 10 हजार डॉलर्स म्हणजेच आजच्या हिशोबाने सुमारे 8 लाख 25 हजार रुपयांना विकण्याचाही प्रयत्न केला होता, पण ते विकता आले नाही.
आता या घराची अवस्था अशी झाली आहे की इथे कोणीही राहू शकत नाही. हे घर वर्षानुवर्षे रिकामेच आहे. सर्वत्र रंगरंगोटी खराब झाली आहे, स्वयंपाकघर जीर्ण झाले आहे, कपाटांची दुरवस्था झाली आहे आणि स्नानगृहांचीही अशीच अवस्था आहे. जर कोणाला हे घर स्वतःचे बनवायचे असेल तर त्याच्याकडे काही मर्यादित कालावधीच आहे. त्यानंतर ही ऑफर संपुष्टात येईल आणि घराची किंमत पुन्हा हजारो डॉलर्समध्ये जाईल.