प्रेक्षकांचा आवडता शो तारक मेहता का उल्टा चष्मा गेल्या काही काळापासून सर्व चुकीच्या कारणांमुळे चर्चेत आहे. काही काळापासून शोच्या निर्मात्यांवर कलाकारांकडून आरोप केले जात आहेत. आता मुंबई पोलिसांनी शोच्या निर्मात्यांविरोधात तक्रार दाखल केली आहे. शोचे निर्माते असित मोदी, ऑपरेशन हेड सोहेल रमाणी आणि कार्यकारी निर्माता जतिन बजाज यांच्या विरोधात एफआयआर दाखल करण्यात आला आहे.
रिपोर्ट्सवर विश्वास ठेवला तर, भारतीय दंड संहितेच्या कलम 354 आणि 509 अंतर्गत एफआयआर नोंदवण्यात आला आहे. या शोच्या कलाकारांमधील केवळ एका अभिनेत्रीने लैंगिक छळाची तक्रार दाखल केली आहे. रिपोर्ट्सनुसार, शोच्या एका अभिनेत्रीने असित मोदी, सोहेल रमाणी आणि जतिन बजाज यांच्यावर कामाच्या ठिकाणी छळ केल्याचा आरोप केला होता. पोलिसांनी अभिनेत्रीचा जबाबही नोंदवला होता. आता पोलिसांनी एफआयआरही नोंदवला आहे, मात्र अद्याप याप्रकरणी कोणालाही अटक करण्यात आलेली नाही.
रिपोर्ट्सनुसार, अभिनेत्रीने एका मुलाखतीदरम्यान सांगितले की, शोचा निर्माता असित मोदी याने शो दरम्यान तिचा विनयभंग केला होता. पण तिला कामावरून काढून टाकले जाईल, या भीतीने ती गप्प राहिली. पण जेव्हा गोष्टी खूप पुढे गेल्या, तेव्हा अभिनेत्रीने निर्मात्यांविरोधात तक्रार दाखल केली आणि अनेक आरोप केले.
तारक मेहता शोशी दीर्घकाळ जोडले गेल्यानंतर अनेक स्पर्धकांनी शो सोडला आणि निर्मात्यांनी फसवणूक केल्याचा आरोपही केला. त्यात तारक मेहताची भूमिका साकारणारा शैलेश लोढा, मिसेस सोढीची भूमिका साकारणारी जेनिफर मिस्त्री बन्सीवाला आणि बावरीची भूमिका साकारणारी मोनिका भदोरिया यांच्या नावांचा समावेश आहे. मात्र असित मोदी यांनी सर्व आरोप फेटाळून लावले आहेत. आता हे प्रकरण पुढे कोणते वळण घेते हे पाहणे औत्सुक्याचे ठरणार आहे.