आयपीएल 2023 च्या 36 व्या सामन्यात कोलकाता नाईट रायडर्सने रॉयल चॅलेंजर्स बंगळुरुचा 21 धावांनी पराभव केला. या सामन्यात बंगळुरूचे नेतृत्व विराट कोहलीने केले होते, जो या पराभवानंतर संतापला होता. त्याने रागाच्या भरात असेही म्हटले की आरसीबी हरण्याच्या लायकीची आहे. खरे तर, प्रथम फलंदाजी करताना केकेआरने 20 षटकांत 5 गडी गमावून 200 धावा केल्या.
केकेआर सर्वत्र आरसीबीपेक्षा पुढे होता. नितीश राणाच्या कोलकाताने आरसीबीला फलंदाजी, गोलंदाजी आणि क्षेत्ररक्षण या तिन्ही ठिकाणी मात दिली. 201 धावांच्या लक्ष्याला प्रत्युत्तर देताना बंगळुरूला 8 गड्यांच्या मोबदल्यात 179 धावाच करता आल्या. पहिले बंगळुरूचे गोलंदाज फ्लॉप झाले, त्यानंतर फलंदाजही चालले नाही.
बंगळुरूकडून विराट कोहलीने सर्वाधिक 54 धावा केल्या होत्या. दुसऱ्या टोकाला त्याला कोणाचाही आधार सापडत नव्हता. आरसीबीचा हा चौथा पराभव आहे. यानंतर कोहली म्हणाला की, आम्ही स्वतःच कोलकाताला सामना दिला. आम्ही हरण्यास लायक होतो. आम्ही व्यावसायिक नव्हतो. गोलंदाजी चांगली होती, पण क्षेत्ररक्षणाची पातळी चांगली नव्हती. कोहलीने सांगितले की आरसीबीने 2 झेल सोडले, त्यामुळे त्यांना 25 ते 30 धावा खर्च कराव्या लागल्या.
कोहली फलंदाजीबद्दलही बोलला. तो म्हणाला की त्याने सर्वकाही व्यवस्थित केले, पण नंतर 4-5 विकेट पडल्या. कोहलीने सांगितले की, ज्या चेंडूंवर त्याने विकेट गमावल्या ते बाद करण्याचे चेंडू नव्हते, तर फलंदाजांनी थेट क्षेत्ररक्षकांच्या दिशेने फटके मारले. भागीदारीवरही त्यांनी भर दिला.
सामन्याबद्दल बोलायचे झाले तर कोलकाताकडून जेसन रॉयने 56, नितीश राणाने 48 आणि व्यंकटेश अय्यरने 31 धावा करत फलंदाजीची जबाबदारी स्वीकारली. त्याचबरोबर सुयश शर्मा आणि आंद्रे रसेलने 2-2 आणि वरुण चक्रवर्तीने 3 बळी घेतले. आरसीबीचे स्टार फलंदाज फाफ डू प्लेसिस, ग्लेन मॅक्सवेल, हर्षल पटेल यांसारखी मोठी नावे फ्लॉप झाली.