31 मार्चपासून इंडियन प्रीमियर लीग 2023 सुरू होत आहे. त्याचवेळी, या स्पर्धेत रॉयल चॅलेंजर्स बंगळुरूचा संघ 1 एप्रिल रोजी पहिला सामना खेळणार आहे. हा सामना मुंबई इंडियन्सविरुद्ध होणार असून, हे आव्हान निश्चित आहे. आता या कठीण आव्हानापुढे आरसीबीचे 3 खेळाडू पहिल्या सामन्यातून बाहेर झाले आहेत. हे तिन्ही खेळाडू आरसीबीचे बलस्थान आहेत आणि फ्रँचायझीने त्यांच्यावर 29.5 कोटी इतका मोठा खर्चही केला आहे.
ग्लेन मॅक्सवेल, जोश हेझलवूड आणि वानेंदू हसरंगा हे आरसीबीच्या पहिल्या सामन्यात खेळणार नसल्याची चर्चा आहे. एवढेच नाही तर हेजलवूड आणि हसरंगा आगामी काही सामन्यांसाठीही बाहेर राहू शकतात. असे का झाले ते पाहूया?
ग्लेन मॅक्सवेल अद्याप पूर्णपणे तंदुरुस्त नाही. या खेळाडूला गेल्या वर्षी एका वाढदिवसाच्या पार्टीत गंभीर दुखापत झाली होती, त्यानंतर त्याच्या पायावरही शस्त्रक्रिया करण्यात आली होती. मॅक्सवेलने नुकतेच भारताविरुद्धच्या एकदिवसीय मालिकेत पुनरागमन केले, परंतु यादरम्यान तो अद्याप पूर्णपणे तंदुरुस्त नसल्याचे दिसून आले. सध्या मॅक्सवेल आरसीबी कॅम्पमध्ये 100 टक्के फिट राहण्याचा प्रयत्न करत आहे. ग्लेन मॅक्सवेलचा पगार 11 कोटी रुपये आहे.
आरसीबीच्या गोलंदाजीचा कणा मानला जाणारा जोश हेझलवूडही काही सामने खेळू शकणार नाही. हेझलवूड आतापर्यंत भारतात पोहोचलेला नाही. हेजलवूडच्या दुखापतीत झपाट्याने सुधारणा होत असल्याची माहिती क्रिकेट ऑस्ट्रेलियाने दिली. दक्षिण आफ्रिकेविरुद्धच्या कसोटी मालिकेदरम्यान हा उजव्या हाताचा वेगवान गोलंदाज जखमी झाला होता. बॉर्डर-गावस्कर मालिकेतही तो खेळला नाही. हेझलवूडला आरसीबीने 7.75 कोटींना विकत घेतले आहे आणि काही सामन्यांमध्ये या खेळाडूला न खेळवल्याने आरसीबीला मोठा फटका बसू शकतो.
लेग-स्पिनर वानेंदू हसरंगा देखील काही सामने खेळू शकणार नाही. 10.75 कोटी रुपयांचा हा खेळाडू सध्या न्यूझीलंडमध्ये एकदिवसीय मालिका खेळत आहे. यानंतर तो टी-20 मालिकाही खेळणार आहे. ही मालिका 8 एप्रिलला संपणार आहे. म्हणजे 6 एप्रिल रोजी होणाऱ्या आरसीबीच्या पुढील सामन्यात हसरंगा खेळणार नाही आणि 10 एप्रिल रोजी होणाऱ्या तिसऱ्या सामन्यात त्याची खेळण्याची शक्यता कमी आहे. अशा परिस्थितीत, हे स्पष्ट आहे की स्पर्धेच्या सुरुवातीच्या सामन्यांमध्ये आरसीबी पूर्ण ताकदीनिशी उतरणार नाही, ही या संघासाठी आणि त्याच्या चाहत्यांसाठी चांगली बातमी नाही.