जगज्जेत्यानंतर ‘शतकवीर’ बनला लिओनेल मेस्सी, हॅट्ट्रिकसह रचला अनोखा विक्रम

मंगळवारी अर्जेंटिनाचा संघ कॅरेबियन संघ कुरासाओविरुद्ध मैत्रीपूर्ण सामना खेळण्यासाठी मैदानात उतरला होता. या सामन्यात अर्जेंटिनाने आपल्या प्रतिस्पर्धी संघाला 7-0 ने चिरडले. मेस्सी आपल्या देश अर्जेंटिनासाठी 174 वा खेळण्यासाठी येथे आला आणि त्याने हा सामना आपल्यासाठी खूप खास बनवला.

मेस्सीने 20 व्या मिनिटाला पहिला गोल केला. दोन बचावपटूंना चकमा देत त्याने साइड किकने गोल केला. या गोलसह त्याचे अर्जेंटिनासाठी गोलचे शतक पूर्ण झाले. अशी कामगिरी करणारा तो अर्जेंटिनाचा पहिला खेळाडू आहे. यानंतर त्याने 33व्या आणि 37व्या मिनिटाला गोल करत हॅट्ट्रिक पूर्ण केली. अर्जेंटिनासाठी मेस्सीने हॅट्ट्रिक करण्याची ही नववी वेळ ठरली. मेस्सीने आता 102 आंतरराष्ट्रीय गोल केले असून सर्वाधिक आंतरराष्ट्रीय गोल करण्याच्या बाबतीत तो तिसऱ्या क्रमांकावर आहे. क्रिस्टियानो रोनाल्डो या यादीत सर्वात वर आहे, ज्याने 122 गोल केले आहेत. आणि इराणच्या अली देईने 102 गोल केले आहेत.

मेस्सी हा आपल्या देशासाठी सर्वाधिक गोल करणारा खेळाडू आहे. त्याने 174 सामन्यात 102 गोल केले आहेत. दुस-या क्रमांकावर गॅब्रिएल बतिस्तुटा आहे, ज्याने 1991 मध्ये पदार्पण केले आणि 78 सामन्यांत 56 गोल केले. सर्जिओ अग्युरो 41 गोलांसह तिसऱ्या आणि हर्नान क्रेस्पो 35 गोलांसह चौथ्या स्थानावर आहे. याचबरोबर अर्जेंटिनाचा पहिला विश्वविजेता कर्णधार डिएगो मॅराडोना 34 गोलांसह पाचव्या स्थानावर आहे.