इंडियन प्रीमियर लीग (IPL) ने 15 वर्षे, 15 हंगाम पूर्ण केले आहेत. आता सर्वांच्या नजरा 16व्या सीझनकडे लागल्या आहेत आणि वाट पाहत आहेत. यंदाच्या हंगामाच्या सुरुवातीस फार दिवस शिल्लक नाहीत. आयपीएल 31 मार्चपासून सुरू होणार असून त्यानंतर 10 संघांमधील ही स्पर्धा पुढील दोन महिने सुरू राहणार आहे. आता स्पर्धा सुरू होण्यासाठी अवघे काही दिवस उरले असून लीगचे 15 हंगाम पूर्ण झाले आहेत, त्यामुळे मागील हंगामातील काही आठवणी ताज्या होणे साहजिक आहे. उदाहरणार्थ, कोण कधी चॅम्पियन झाला, ऑरेंज कॅप कोणी जिंकली, कोणी सर्वाधिक विकेट घेतल्या. सध्या चर्चा आहे लीगच्या पहिल्या सीझनची म्हणजेच 2008 च्या सीझनची.
2008 मध्ये आयपीएलला सुरुवात झाली आणि पहिल्याच सामन्यात ब्रेंडन मॅक्युलमने स्फोटक शतक झळकावून वातावरणनिर्मिती केली. त्यानंतर अनेक फलंदाजांच्या धुमश्चक्री खेळींनी रंगत आणली. असे काही गोलंदाज देखील होते, ज्यांनी फलंदाजांच्या फटकेबाजीला न जुमानता त्यांच्यावर भारी पडले आणि विकेट घेण्यात यशस्वी ठरले. आता जर तुमच्या मनात प्रश्न असेल की पहिल्या सत्रातील सर्वात यशस्वी फलंदाज आणि गोलंदाज कोण होता, तर त्याचे उत्तर येथे मिळेल.
इंडियन लीगच्या पहिल्या सत्रातील सर्वात यशस्वी फलंदाजांमध्ये सचिन तेंडुलकर, एमएस धोनी, युवराज सिंग किंवा ख्रिस गेल आणि रिकी पाँटिंगसारखी मोठी नावे नव्हती, तर शॉन मार्शचे नाव होते. या ऑस्ट्रेलियन डावखुऱ्या फलंदाजाने IPL 2008 मध्ये एकापेक्षा जास्त मोठी नावे मागे टाकली आणि लीगमध्ये सर्वाधिक धावा केल्या. किंग्ज इलेव्हन पंजाब (आता पंजाब किंग्ज) कडून सलामी आलेल्या मार्शने केवळ 11 डावात विक्रमी 616 धावा केल्या. त्याची सरासरी 68.44 आणि स्ट्राइक रेट 139.68 होता. यादरम्यान त्याने 5 अर्धशतके आणि 1 शतक झळकावले होते. मात्र उपांत्य फेरीत त्यांचा संघ पराभूत झाला.
तर सोहेल तन्वीरने गोलंदाजीत हा पराक्रम केला. लीगच्या पहिल्या सत्रात पाकिस्तानचे खेळाडूही सहभागी झाले होते. पाकिस्तानी खेळाडूंनी आयपीएलमध्ये भाग घेतलेला हा पहिला आणि शेवटचा हंगाम होता. त्या हंगामात उंच डाव्या हाताचा मध्यमगती गोलंदाज तनवीर स्टार ठरला. राजस्थान रॉयल्सकडून खेळताना सोहेल तन्वीरने 11 डावात सर्वाधिक 22 बळी घेतले. या काळात त्यांची इकोनॉमी केवळ 6.46 होती, तर सरासरी 12.09 होती. तनवीरने अंतिम फेरीत एक विकेट घेत राजस्थानने विजेतेपद पटकावले.