जसप्रीत बुमराह आणि त्याच्या चाहत्यांना मोठी बातमी मिळाली आहे. अनेक दिवसांपासून दुखापतीने त्रस्त असलेल्या जसप्रीत बुमराहचे ऑपरेशन यशस्वी झाले आहे. बुमराहची शस्त्रक्रिया न्यूझीलंडमधील क्राइस्टचर्चमध्ये झाली. डॉ. रोवन शोटेन यांनी हे ऑपरेशन फोर्ट ऑर्थोपेडिक्स हॉस्पिटलमध्ये केले असून ही शस्त्रक्रिया यशस्वी झाल्याचे सांगण्यात येत आहे. जसप्रीत बुमराह लोअर स्ट्रेस बॅक फ्रॅक्चरने त्रस्त होता.
आता प्रश्न असा आहे की, या शस्त्रक्रियेनंतर जसप्रीत बुमराह मैदानात कधी परतणार? Cricbuzz च्या अहवालानुसार, जसप्रीत बुमराहला पूर्णपणे तंदुरुस्त होण्यासाठी जास्तीत जास्त 24 आठवडे म्हणजेच 6 महिने लागतील. म्हणजे जसप्रीत बुमराह या वेळेपूर्वीच बरा होऊ शकतो.
बुमराह 6 महिन्यांनंतरही पूर्ण तंदुरुस्तीसह मैदानात उतरला, तर चांगली गोष्ट म्हणजे हा गोलंदाज एकदिवसीय विश्वचषकात खेळू शकेल. भारतात 2023 चा विश्वचषक ऑक्टोबरमध्ये सुरू होणार आहे. बुमराह हा टीम इंडियाच्या मोठ्या मॅचविनरपैकी एक आहे आणि जर हा खेळाडू फिट झाला, तर भारताच्या विजयाची शक्यता अधिक मजबूत होईल.
या शस्त्रक्रियेमुळे जसप्रीत बुमराह आयपीएल 2023 मधून बाहेर झाला आहे. यासोबतच तो सप्टेंबरमध्ये होणाऱ्या आशिया कपमध्येही सहभागी होऊ शकणार नाही. हा खेळाडू गेल्या वर्षी सप्टेंबरपासून दुखापतीशी झुंजत आहे. बुमराह शेवटचा आशिया चषक, टी-20 विश्वचषकही खेळू शकला नव्हता.
मुंबई इंडियन्सचे गोलंदाजी प्रशिक्षक आणि न्यूझीलंडचा माजी वेगवान गोलंदाज शेन बाँड यांच्या सल्ल्याने जसप्रीत बुमराहला क्राइस्टचर्चला पाठवल्याचेही वृत्त आहे. जरी या खेळाडूने याची पुष्टी केलेली नाही. बुमराहवर शस्त्रक्रिया करणाऱ्या डॉक्टरांनी जोफ्रा आर्चर, जेम्स पॅटिनसन, जेसन बेहरेनडॉर्फ या गोलंदाजांवरही शस्त्रक्रिया केली आहे.