दुखापतीनंतर पुनरागमन करणारा टीम इंडियाचा स्टार अष्टपैलू रवींद्र जडेजा सातत्याने चमकदार कामगिरी करत विक्रम करत आहे. ऑस्ट्रेलियाविरुद्धच्या कसोटी मालिकेतील पहिल्या दोन सामन्यांमध्ये आश्चर्यकारक कामगिरी केल्यानंतर, जडेजाने तिसऱ्या कसोटीतही असे काही केले, जे भारतीय क्रिकेटमध्ये यापूर्वी एकदाच घडू शकले.
इंदूर कसोटीच्या पहिल्या दिवशी रवींद्र जडेजाने ऑस्ट्रेलियाच्या पहिल्या डावात सलामीवीर ट्रॅव्हिस हेडची विकेट घेताच त्याच्या आंतरराष्ट्रीय क्रिकेटमधील 500 बळी पूर्ण झाले. अशाप्रकारे त्याने भारताचा महान अष्टपैलू खेळाडू कपिल देव यांच्यासोबत एका खास रेकॉर्डमध्ये आपले नावही नोंदवले.
या विकेटसह, जडेजा आंतरराष्ट्रीय क्रिकेटमध्ये 500 बळी घेणारा आणि 5000 हून अधिक धावा करणारा दुसरा भारतीय खेळाडू ठरला. त्यांच्या आधी फक्त कपिल देव यांनी हा पराक्रम केला होता. कपिल देवच्या नावावर कसोटी आणि वनडेसह 9 हजारांहून अधिक धावा आणि 787 विकेट्स आहेत. दुसरीकडे, जडेजाच्या नावावर कसोटी, एकदिवसीय आणि टी-20 यांसह 5527 धावा आणि 502 विकेट्स आहेत.
जडेजाने हेडची विकेट घेतल्यानंतर मार्नस लबुशेनलाही त्याचा बळी बनवले, तर ऑस्ट्रेलियासाठी या डावात सर्वोत्तम अर्धशतक झळकावणारा उस्मान ख्वाजाही भारतीय फिरकी गोलंदाजाचा बळी ठरला. जडेजाने ऑस्ट्रेलियाचे पहिले तीन विकेट घेतले.
या मालिकेत रवींद्र जडेजा भारताचा सर्वात यशस्वी गोलंदाज ठरला आहे. ऑस्ट्रेलियाविरुद्ध मायदेशात नेहमीच प्रभावी ठरणाऱ्या जडेजाने पहिल्या दोन कसोटीत 17 विकेट्स घेतल्या, तर 96 धावा केल्या.