क्रिकेट हा भलेही सांघिक खेळ असो पण, काही खेळाडूंसाठी अशी काही मैदाने आहेत, जिथे त्यांचेच पारडे जड असते. अफगाणिस्तानच्या करीम जनातसाठी अबुधाबीचे मैदान असेच काहीसे आहे आणि परिणामी, जेव्हा UAE विरुद्धच्या T20 मालिकेचा निर्णय घ्यायचा झाला, तेव्हा करीम जनात एकटाच अफगाणिस्तानच्या विजयाचा शिल्पकार बनला.
सामन्याची स्थिती सांगण्यापूर्वी अबू धाबीच्या मैदानावर 24 वर्षीय करीम जनातच्या धावांच्या अफेअरबद्दल जाणून घ्या. करीमने आतापर्यंत T20 च्या आंतरराष्ट्रीय खेळपट्टीवर 29 डाव खेळले आहेत. या 29 डावांपैकी त्याने 9 डाव अबुधाबीमध्ये खेळले आहेत, तर उर्वरित 20 डाव इतर मैदानांवर खेळले.
करीम जनातने अबुधाबीमध्ये खेळल्या गेलेल्या 9 T20I डावांमध्ये 47 च्या सरासरीने 282 धावा केल्या आहेत. यादरम्यान त्याचा स्ट्राइक रेट 154.09 राहिला आहे. आता जर आपण इतर मैदानांवर खेळलेल्या त्याच्या 20 T20I डावांवर नजर टाकली, तर तेथे त्याने 10.88 च्या माफक सरासरीने फक्त 196 धावा केल्या आहेत आणि त्याचा स्ट्राइक रेट 92.45 आहे.
अबुधाबीमध्येच अफगाणिस्तानला UAE विरुद्धची मालिका जिंकण्यात मदत करताना करीम जनातने T20I मधील सर्वात मोठी धावसंख्याही केली. त्याने UAE विरुद्ध अवघ्या 22 चेंडूत नाबाद 56 धावा ठोकल्या आणि सामना बरोबरीत आणला. यादरम्यान त्याने 5 षटकार आणि 4 चौकार लगावले. म्हणजे त्याने फक्त 9 चेंडूत 46 धावा केल्या.
अफगाणिस्तानसाठी करो किंवा मरोच्या सामन्यात 164 धावांच्या लक्ष्याचा पाठलाग करताना करीम जनातची ही स्फोटक शैली पाहायला मिळाली. सहाव्या क्रमांकावर उतरून त्याने हा धमाका केला. तत्पूर्वी, प्रथम फलंदाजी करताना UAE ने 20 षटकांत 6 गडी गमावून 163 धावा केल्या होत्या, ज्याचा पाठलाग अफगाणिस्तानने 19.1 षटकांत 4 गडी गमावून पूर्ण केला. या विजयासह अफगाणिस्तान संघाने UAE विरुद्धची T20 मालिका 2-1 ने जिंकली.