टीम इंडियाचा यष्टीरक्षक ऋषभ पंतला डेहराडूनहून मुंबईच्या रुग्णालयात हलवण्यात आले आहे. रस्ते अपघातात खूप त्रास सहन करावा लागला असून आता त्याच्या पायाच्या लिगामेंटची मुंबईत शस्त्रक्रिया होणार आहे. पंतला ज्या प्रकारची दुखापत झाली आहे, त्यानंतर त्याला आयपीएल 2023 मध्ये खेळणे कठीण जाणार आहे. आता प्रश्न असा आहे की ऋषभ पंत जर आयपीएल खेळला नाही तर त्याला पगार मिळेल का?
रिपोर्ट्सनुसार, दिल्ली कॅपिटल्सने ऋषभ पंतला 16 कोटी रुपये दिले आहेत, पण आता जर तो ही स्पर्धा खेळू शकला नाही, तर ही रक्कम त्याला मिळेल का? ऋषभ पंत जरी IPL 2023 मध्ये खेळला नाही, तरी त्याला पूर्ण पैसे मिळतील. फरक एवढाच आहे की हा पैसा त्याला दिल्ली कॅपिटल्स देणार नाही तर बीसीसीआय देणार आहे.
वास्तविक, नियमांनुसार, बोर्ड बीसीसीआयच्या केंद्रीय करारामध्ये समाविष्ट असलेल्या खेळाडूंना विमा देते. आयपीएलपूर्वी हे खेळाडू जखमी झाले किंवा अपघात झाला तर बीसीसीआय त्यांना संपूर्ण रक्कम देते. बीसीसीआयचा हा नियम 2011 पासून लागू झाला. गेल्या वर्षी दीपक चहरलाही आयपीएल 2022 च्या आधी दुखापत झाली होती. त्याला चेन्नई सुपरकिंग्सने 14 कोटींना विकत घेतले होते. रिपोर्ट्सनुसार त्याला संपूर्ण रक्कम मिळाली होती.