बेंगळुरू येथील न्यायालयाने एका संगीत कॉपीराइट प्रकरणी कारवाई करत काँग्रेसचे ट्विटर हँडल आणि ‘भारत जोडो यात्रा’ या चळवळीला तात्पुरती ब्लॉक करण्याचे आदेश दिले आहेत. एमआरटी म्युझिकने दाखल केलेल्या याचिकेवर न्यायालयाने हे आदेश दिले आहेत. प्रथमदर्शनी पुरावे सादर केल्यानंतरही साउंड रेकॉर्डच्या कथित बेकायदेशीर वापरास प्रोत्साहन दिल्यास फिर्यादीला त्रास सहन करावा लागेल आणि यामुळे मोठ्या प्रमाणावर कॉपीराइट उल्लंघन होईलअसे न्यायालयाने सांगितले .
काय आहे हे प्रकरण ?
काँग्रेस नेते राहुल गांधी यांच्याविरोधात कॉपीराइट कायद्याअंतर्गत गुन्हा दाखल करण्यात आला होता. राहुल गांधी सध्या भारत जोडो यात्रेवर आहेत. या भेटीचा प्रचार करण्यासाठी अनेक व्हिडिओ सोशल मीडियावर शेअर करण्यात आले. यामध्ये काँग्रेसने सुपरस्टार यशच्या ‘केजीएफ’ चित्रपटाचे संगीत वापरले आहे, त्यामुळे केजीएफ चॅप्टर 2 फेम एमआरटी म्युझिकने कॉपीराइट कायद्यांतर्गत तक्रार दाखल केली होती. एमआरटी म्युझिकच्या तक्रारीच्या आधारे यशवंतपूर पोलीस ठाण्यात दाखल करण्यात आलेल्या या एफआयआरमध्ये राहुल गांधी, जयराम रमेश आणि सुप्रिया श्रीनेट यांची नावे आहेत.
काँग्रेसने दिली प्रतिक्रिया
बंगळुरू न्यायालयाने दिलेल्या आदेशावर काँग्रेसने प्रतिक्रिया दिली आहे. काँग्रेसने त्यांच्या अधिकृत ट्विटर हँडलवरून पोस्ट केले आहे की आम्ही सोशल मीडियावर आयएनसी आणि बीजेवाय एसएम हँडलविरुद्ध बेंगळुरू न्यायालयाच्या आदेशाबद्दल वाचले आहे. आम्हाला कळवण्यात आले नाही किंवा न्यायालयीन कामकाजात हजर झालो नाही. तसेच आदेशाची प्रतही प्राप्त झालेली नाही. याबाबत आम्ही सर्व कायदेशीर उपाय अवलंबत आहोत.