पाकिस्तान संघाचा कर्णधार बाबर आझम पुन्हा जुन्या फॉर्ममध्ये परतला आहे. बाबरने न्यूझीलंडमध्ये सुरू असलेल्या तिरंगी मालिकेत बांगलादेशविरुद्ध 40 चेंडूत शानदार अर्धशतक झळकावले. या खेळीसोबतच त्याने भारताचा अनुभवी फलंदाज विराट कोहली आणि भारतीय संघाचा कर्णधार रोहित शर्मा यांचा खास विक्रम मोडीत काढला आहे.
मोडला विराट कोहलीचा विक्रम
पाकिस्तानचा 27 वर्षीय फलंदाज बाबर आझमने आंतरराष्ट्रीय क्रिकेटमध्ये 11 हजार धावा पूर्ण केल्या आहेत. बाबरने अवघ्या 251 डावात ही कामगिरी केली आहे. आता तो सर्वात जलद 11,000 धावा करणारा आशियाई खेळाडू बनला आहे. बाबरच्या आधी हा विक्रम विराट कोहलीच्या नावावर होता, त्याने 261 डावात हा विक्रम केला होता. त्याचबरोबर या यादीत तिसरा क्रमांक भारताचा माजी कर्णधार आणि महान फलंदाज सुनील गावस्करचा आहे, त्यांनी 262 डावांमध्ये 11 हजार धावा केल्या होत्या. त्याचबरोबर पाकिस्तानसाठी अशी कामगिरी करणारा तो 11वा खेळाडू ठरला आहे.
रोहित शर्माही राहिला मागे
त्याचबरोबर विराट कोहलीशिवाय बाबरने भारतीय संघाचा कर्णधार रोहित शर्मालाही मागे टाकले आहे. वास्तविक, बाबरने तिरंगी मालिकेत बांगलादेशविरुद्ध 29 टी-20 आंतरराष्ट्रीय अर्धशतक झळकावले. आता तो आंतरराष्ट्रीय T20 मध्ये सर्वाधिक अर्धशतक ठोकणारा खेळाडू बनला आहे. बाबरच्या आधी हा विक्रम भारतीय कर्णधार रोहित शर्माच्या नावावर होता, त्याने आपल्या T20 कारकिर्दीत 28 आंतरराष्ट्रीय टी-20 अर्धशतके झळकावली आहेत.
पाकिस्तानने गाठली तिरंगी मालिकेची अंतिम फेरी
न्यूझीलंडमध्ये खेळल्या जात असलेल्या तिरंगी मालिकेत गुरुवारी पाकिस्तानने बांगलादेशचा टी-20 सामन्यात 7 गडी राखून पराभव केला. येथे मोहम्मद रिझवानने पुन्हा एकदा अर्धशतक झळकावले. रिझवानचे गेल्या 10 सामन्यांमधील हे सहावे अर्धशतक आहे. त्याला ‘प्लेअर ऑफ द मॅच’ म्हणूनही गौरविण्यात आले.