मुंबई : मुंबई पोलिसांच्या क्राइम ब्रँचच्या खंडणी विरोधी कक्षाने दाऊद टोळीविरुद्धची कारवाई तीव्र केली आहे. मुंबईत दाऊद टोळीतील 5 सक्रिय सदस्यांना मुंबई पोलिसांनी तपास यंत्रणांसह अटक केली आहे. काल संध्याकाळी खंडणी प्रकरणात अंडरवर्ल्ड डॉन दाऊद इब्राहिमच्या टोळीशी संबंधित 5 जणांना अटक करण्यात आली आहे.
सूत्रांवर विश्वास ठेवायचा झाल्यास, रियाझ भाटी आणि सलीम फ्रूट यांच्याकडून जीवे मारण्याच्या धमक्या मिळाल्यानंतर एका व्यावसायिकाने पोलिसांत तक्रार केली होती. त्यानंतर या पाच आरोपींना अटक करण्यात आली आहे. सूत्रांनी दिलेल्या माहितीनुसार, दाऊदच्या दोन्ही सदस्यांनी व्यावसायिकाकडे रोल्स रॉयस कारची मागणी केली होती.
मे महिन्यात करण्यात आली होती छोटा शकीलला अटक
राष्ट्रीय तपास संस्थेने (एनआयए) मोठी कारवाई करत मे महिन्यात छोटा शकीलला अटक केली होती. त्यानंतर मुंबई पोलिसांनी डी गँगवर धडक कारवाई सुरू केली. काही दिवसांपूर्वी दाऊद टोळीचा आणखी एक सरदार गँगस्टर रियाज भाटी याला मुंबई पोलिसांनी अटक केली होती.
काय आहेत आरोपींची नावे
अजय गोसारिया, फिरोज लेदर, समीर खान, अमजद रेडकर आणि एक अनोळखी व्यक्ती अशी अटक करण्यात आलेल्या आरोपींची नावे असून त्यांचे नाव अद्याप समजू शकलेले नाही. अटक करण्यात आलेल्या पाच आरोपींना न्यायालयात हजर करण्यात येणार असल्याची माहिती सूत्रांनी दिली. पोलिसांनी दिलेल्या माहितीनुसार, अटक करण्यात आलेल्या आरोपींची अधिक चौकशी करण्यात येत आहे.
मकोका देखील लागू करण्यात आला आहे
सलीम फ्रूट आणि रियाझ भाटी यांच्यावरही मकोका लावण्यात आला आहे. या कारवाईनंतर डी गँगचे आणखी सदस्य पोलिसांच्या रडारवर आहेत. अंडरवर्ल्ड डॉन दाऊद इब्राहिमचा प्रभाव मुंबईतून हळूहळू कमी होत आहे. पोलिसांबरोबरच तपास यंत्रणाही या गँगचा खात्मा करण्यात गुंतल्या आहेत. डी गँगवर मुंबई पोलिसांची सतत करडी नजर असते.