मुंबई : शहरात बुधवारी पहिल्यांदाच दोन दसरा मेळावे पाहायला मिळाले. शिंदे गटाचा मेळावा बीकेसीत होता, तर ठाकरे गटाचा मेळावा शिवाजी पार्कमध्ये होता. दोन्ही मेळाव्यात नेत्यांनी वर्चस्व दाखवण्याचा प्रयत्न केला आणि दरम्यानच्या काळात ध्वनिप्रदूषणाची काळजी घेतली नाही. दोन्ही रॅलींमध्ये आवाजाच्या मर्यादेचे उल्लंघन झाले आहे. प्रदूषणाविरुद्ध लढा देणाऱ्या ‘आवाज फाऊंडेशन’ या संस्थेच्या नोंदीनुसार, उद्धव ठाकरेंच्या शिवाजी पार्कमधील सभेत ध्वनी प्रदूषणाची मर्यादा १०१.६ डेसिबलपर्यंत पोहोचली होती, तर मुख्यमंत्री एकनाथ शिंदे यांच्या बीकेसीतील सभेतील आवाजाची मर्यादा ९१.६ डेसिबलपर्यंत होती.
कोरोनामुळे गेल्या दोन वर्षांपासून शिवाजी पार्कमध्ये शिवसेनेचा दसरा मेळावा झाला नव्हता. यंदा कोरोना संपल्यानंतर शिवसेनेचा दसरा मेळावा शिवाजी पार्कवर झाला. या रॅलीला प्रतिसाद म्हणून मुख्यमंत्र्यांनी वांद्रे-कुर्ला संकुलातील एमएमआरडीए मैदानावर दसरा मेळावा आयोजित केला होता. ‘आवाज’च्या सुमेरा अब्दुल अली यांनी सांगितले की, 2019 च्या तुलनेत यावेळी शिवाजी पार्कमध्ये ध्वनी प्रदूषण जास्त होते. 2109 मध्ये येथील आवाज 93.9 डेसिबल एवढा रेकॉर्ड झाला होता. बीकेसी येथे आवाजाची मर्यादा 91.6 डेसिबलपर्यंत पोहोचली. आवाजने शिवाजी पार्क परिसरात सायंकाळी साडेपाच ते रात्री नऊ वाजेपर्यंतचे ध्वनी प्रदूषण मोजले.