मुंबई : निर्माणाधीन नवी मुंबई आंतरराष्ट्रीय विमानतळ 2024 मध्ये कार्यान्वित होईल, असे महाराष्ट्राचे उपमुख्यमंत्री देवेंद्र फडणवीस यांनी रविवारी येथे सांगितले. ते मराठा चेंबर ऑफ कॉमर्स, इंडस्ट्रीज अँड अॅग्रिकल्चर (एमसीसीआयए) येथे बोलत होते. महाराष्ट्राची ‘औद्योगिक संस्कृती’ लवकरच रुळावर येईल, असेही फडणवीस म्हणाले. ते म्हणाले, महाराष्ट्राला पुन्हा एकदा नंबर वन करण्यासाठी प्रत्येक संबंधितांना एकत्र येऊन प्रयत्न करावे लागतील.
मुंबई आंतरराष्ट्रीय विमानतळावरील कमी होईल ताण
वास्तविक, नवी मुंबईत 1997 मध्ये नवीन विमानतळाचा प्रस्ताव ठेवण्यात आला होता आणि 2007 मध्ये त्याला सरकारने मान्यता दिली होती. प्रकल्पात जमीन संपादन करण्यास विलंब झाला. याआधी महाआघाडी सरकारमध्ये उपमुख्यमंत्री असलेले अजित पवार यांनीही नवी मुंबईतील नवीन आंतरराष्ट्रीय विमानतळाचे सुरू असलेले काम 2024 पर्यंत पूर्ण होईल, असे सांगितले होते. नवी मुंबईतील विमानतळाच्या उभारणीनंतर मुंबई आंतरराष्ट्रीय विमानतळावरील ताण पूर्वीपेक्षा खूपच कमी होणार असून प्रवाशांना चांगल्या सुविधा उपलब्ध होणार आहेत.
2018 मध्ये पंतप्रधानांनी केली होती पायाभरणी
2024 पर्यंत ग्रीनफिल्ड नवी मुंबई आंतरराष्ट्रीय विमानतळ उघडल्यावर भारत जगातील तिसरा सर्वात मोठा विमान वाहतूक बाजार बनणार आहे. या विमानतळाच्या उभारणीनंतर अदानी समूहाकडे एकूण आठ विमानतळे होतील. प्रवासी आणि मालवाहू वाहतुकीच्या दृष्टीने मुंबई विमानतळ हे भारतातील दुसरे सर्वात व्यस्त विमानतळ आहे. व्यवस्थापन आणि विकास पोर्टफोलिओमध्ये आठ विमानतळांसह, AAHL आता भारतातील सर्वात मोठी विमानतळ पायाभूत सुविधा कंपनी बनली आहे. विशेष म्हणजे 2018 मध्ये पंतप्रधान नरेंद्र मोदी यांनी त्याची पायाभरणी केली होती. नवी मुंबई आंतरराष्ट्रीय विमानतळ हे 3,700 मीटरच्या दोन समांतर धावपट्टी आणि 1,550 मीटरच्या पूर्ण लांबीच्या टॅक्सीवेसह जगातील सर्वात मोठ्या ग्रीनफिल्ड विमानतळांपैकी एक म्हणून ओळखले जाते.