रांची: झारखंडमध्ये रांची पोलिसांनी भाजपचे निलंबित नेते आणि माजी आयएएस अधिकाऱ्याची पत्नी सीमा पात्रा यांना एका मोलकरणीवर अत्याचार केल्याप्रकरणी अटक केली आहे. याप्रकरणी अरगोरा पोलिस ठाण्यात सीमा यांच्याविरुद्ध गुन्हा दाखल करण्यात आला होता. तत्पूर्वी, रांची पोलिसांनी नोंदवले होते की, पोलिसांच्या पथकाने 22 ऑगस्ट रोजी एका माजी IAS अधिकाऱ्याच्या घरी घरगुती नोकर म्हणून काम करणाऱ्या 29 वर्षीय महिलेची तिच्या मालकाकडून शारीरिक छळ केल्याच्या आरोपावरून सुटका केली होती. पीडितेवर सध्या उपचार सुरू आहेत.
यापूर्वी, राष्ट्रीय महिला आयोगाने (NCW) माजी आयएएस अधिकाऱ्याच्या पत्नीला तिच्या घरगुती नोकराचा छळ केल्याप्रकरणी अटक करण्याची मागणी केली होती. आयोगाने या प्रकरणाच्या निर्धारित कालावधीत निष्पक्ष तपास आणि पीडितेला चांगले उपचार देण्याची मागणी केली.
मुलाला पाठवले मनोरुग्णालयात
एनसीडब्ल्यूने म्हटले होते की, मीडिया रिपोर्ट्सनुसार, माजी आयएएस अधिकारी महेश्वर पात्रा यांच्या पत्नी सीमा पात्रा यांनी तिच्या घरगुती नोकरावर हल्ला केला आणि त्रास दिला. रिपोर्ट्सनुसार, सीमा पात्रा तिला अनेक दिवस उपाशी आणि तहानलेली ठेवायची, तिने लोखंडी रॉडने मारून तिचे दात देखील तोडले होते.
सीमा पात्रा यांनी घरात काम करणारी मोलकरीण सुनीतावर थर्ड डिग्री टॉर्चर सुरू केल्याचा आरोप आहे, त्यानंतर तिचा तरुण मुलगा आयुष्मान पात्रा याने विरोध केला. यावर सीमा पात्रा यांनी आपल्या मुलाला मनोरुग्ण घोषित केले आणि त्याला रांचीच्या प्रसिद्ध मानसिक रुग्णालयात रिनपासमध्ये दाखल केले. मुलाच्या हातात बेड्या घालून त्याला जबरदस्तीने येथे दाखल केले होते. सोमवारी सुनीता यांच्या मारहाणीचे वृत्त प्रसिद्ध होताच त्यांनी आपल्या मुलाला तातडीने येथून सोडवून घेतले आहे.