दुबई – आशिया चषक स्पर्धेत चांगली कामगिरी करणाऱ्या खेळाडूंना आयसीसी क्रमवारीतही फायदा झाला आहे. पाकिस्तानविरुद्ध तीन विकेट आणि 33 धावा करणाऱ्या हार्दिक पांड्याला अष्टपैलू क्रमवारीत आठ स्थानांचा फायदा झाला आहे. तो पाचव्या क्रमांकावर पोहोचला आहे. त्याचवेळी सूर्यकुमार यादवला एका स्थानाचे नुकसान झाले असून, तो तिसऱ्या स्थानावर आहे. गोलंदाजांमध्ये भुवनेश्वर कुमार आठव्या स्थानावर आहे.
पाकिस्तानविरुद्धच्या सामन्यात हार्दिक पांड्याने 25 धावांत तीन बळी घेतले आणि 17 चेंडूत 33 धावा केल्या. या कामगिरीमुळे त्याने कारकिर्दीतील सर्वोत्कृष्ट अष्टपैलू रँकिंग गाठले आहे. आशिया चषक स्पर्धेतील दोन्ही साखळी सामने जिंकून सुपर फोरमध्ये स्थान मिळवणाऱ्या अफगाणिस्तान संघातील अनेक खेळाडूंना आयसीसी क्रमवारीत फायदा झाला आहे.
रशीद खानला दोन स्थानांचा फायदा झाला असून तो गोलंदाजांच्या क्रमवारीत तिसऱ्या स्थानावर पोहोचला आहे. त्याचे 708 रेटिंग गुण आहेत. तबरेज शम्सी 716 गुणांसह दुसऱ्या स्थानावर आहे. त्याचबरोबर या यादीत कांगारू वेगवान गोलंदाज पहिल्या स्थानावर आहे. त्याचे 792 गुण आहेत. रशीदचा साथीदार मुजीब उर रहमानलाही सात स्थानांचा फायदा झाला असून तो पहिल्या दहामध्ये आहे. भारताकडून पाकिस्तानविरुद्ध 26 धावांत चार बळी घेणारा भुवनेश्वर कुमार आठव्या स्थानावर आहे.
रिझवानने पटकावले दुसरे स्थान
फलंदाजांमध्ये कोणताही नवा खेळाडू टॉप 10 मध्ये आलेला नाही, मात्र पाकिस्तानच्या मोहम्मद रिझवानने सूर्यकुमार यादवला मागे टाकत दुसरे स्थान पटकावले आहे. बाबर पहिल्या स्थानावर कायम आहे. अफगाणिस्तानच्या हजरतुल्ला झाझाईला तीन स्थानांचा फायदा झाला असून तो आता 14व्या स्थानावर आहे. त्याचवेळी रहमानउल्ला गुरबाज पाच स्थानांच्या वाढीसह 29व्या स्थानावर आहे.
कसोटी क्रमवारीत बेन स्टोक्सची वाढ
स्टोक्सने दक्षिण आफ्रिकेविरुद्ध शतक झळकावले, त्यानंतर पहिल्या डावात 17 धावांत दोन बळी घेतले आणि दुसऱ्या डावात 30 धावांत दोन बळी घेतले. या कामगिरीमुळे त्याला फलंदाजांच्या क्रमवारीत नऊ स्थानांचा फायदा झाला आहे. तो 18 व्या स्थानावर आला आहे. त्याला गोलंदाजी क्रमवारीत पाच स्थानांचा फायदा झाला असून तो 38व्या स्थानावर पोहोचला आहे. अष्टपैलू खेळाडू क्रमवारीत दुसऱ्या स्थानावर आला आहे. भारताचा रवींद्र जडेजा हा पहिल्या क्रमांकाचा अष्टपैलू खेळाडू आहे.