नवी दिल्ली : केंद्रीय मंत्री नितीन गडकरी यांना नुकतेच भाजपच्या संसदीय मंडळातून बाहेर करण्यात आले. त्यांचे भाजप नेतृत्वाशी मतभेद असल्याच्या बातम्या येत होत्या. मात्र, गडकरी आणि पक्षाने असे वृत्त फेटाळून लावले. आता गडकरींनी खुलासा केला आहे की, अनेक वर्षांपूर्वी त्यांना काँग्रेस पक्षात येण्याची ऑफर आली होती. नागपुरात झालेल्या उद्योजकांच्या बैठकीत गडकरींनी तरुणपणीचा हा किस्सा सांगितला. गडकरींनी आठवण करून दिली की, ते विद्यार्थी नेते असताना काँग्रेस नेते डॉ. श्रीकांत जिचकर यांनी त्यांना चांगल्या भविष्यासाठी काँग्रेसमध्ये येण्यास सांगितले होते. केंद्रीय मंत्री म्हणाले, त्यांनी मला सांगितले, तू चांगला माणूस आहेस, तुला चांगले राजकीय भविष्य आहे, पण तू चुकीच्या पक्षात आहेस. तुम्ही काँग्रेसमध्ये या…, मी म्हणालो श्रीकांत मी विहिरीत उडी मारेन पण मी काँग्रेसमध्ये जाणार नाही, कारण काँग्रेसच्या विचारसरणीचा मी नाही.
‘तुम्ही कोणाचा हात घेतला तर तो शेवटपर्यंत धरुन रहा…’
गडकरींनी रिचर्ड निक्सन यांच्या विधानाचा हवाला दिला की, माणूस पराभूत होतो, तेव्हा त्याला अंत नसतो. जेव्हा ज्याने हार मानली, तेव्हा तो संपला. उद्योजकांच्या बैठकीत गडकरी यांनी ही माहिती दिली. ते म्हणाले की, जो कोणी व्यवसाय, सामाजिक कार्य किंवा राजकारणात असेल, त्याच्यासाठी मानवी संपर्क ही सर्वात मोठी ताकद आहे. भाजपच्या संसदीय मंडळातून बाहेर केल्यामुळे नुकतेच चर्चेत असलेले गडकरी म्हणाले, म्हणून कोणीही ‘वापरा आणि फेक’च्या फेरीत अडकू नये. चांगले दिवस असोत की वाईट दिवस, एकदा का कोणाचा हात धरला की तो शेवटपर्यंत धरा. उगवत्या सूर्याची पूजा करू नका.
अफवा पसरवणाऱ्यांना गडकरींनी दिला होता इशारा
गडकरींनी काही दिवसांपूर्वी त्यांचे टीकाकार आणि प्रसारमाध्यमांच्या एका वर्गाला फटकारले होते. राजकीय फायद्यासाठी त्यांची विधाने चुकीची मांडली जात असल्याचे त्यांनी म्हटले होते. एका कार्यक्रमादरम्यान त्यांनी काही वर्षांपूर्वीचा एक किस्सा सांगितला होता की, त्यांना या पदाचा लोभ नाही. ते गेले तरी जाऊ दे. पण आप नेत्याने त्यांचा तो व्हिडीओ ट्विट केला होता आणि गडकरी असे का बोलत आहेत, यावरून भाजपमध्ये गोंधळ सुरू आहे. यानंतर त्यांनी पद सोडल्याच्या बातम्या प्रसारमाध्यमांच्या एका भागात प्रसारित होऊ लागल्या. हे सर्व वृत्त दिशाभूल करणारे असल्याचे सांगत त्यांनी असे करणाऱ्यांवर कायदेशीर कारवाई करण्याचा इशाराही दिला.
आपल्या विधानांमुळे चर्चेत राहणारे गडकरी यांना गेल्या आठवड्यात भाजपच्या संसदीय मंडळातून हटवण्यात आले होते. सरकार आणि पक्षाच्या हितासाठी अशी विधाने करणाऱ्यांविरोधात कायदेशीर मार्ग स्वीकारणार असल्याचे त्यांनी गुरुवारी सांगितले. गडकरींनी ट्विट केले की, आज पुन्हा एकदा मुख्य प्रवाहातील मीडिया, सोशल मीडियाचा एक भाग आणि काही लोकांकडून राजकीय फायद्यासाठी माझ्याविरुद्ध द्वेषपूर्ण आणि बनावट मोहीम सुरू ठेवण्याचा प्रयत्न केला जात आहे. माझी विधाने सार्वजनिक कार्यक्रमात योग्य संदर्भाशिवाय प्रक्षेपित केली जात आहेत.