नवी दिल्ली : देशातील दुसऱ्या क्रमांकाचे श्रीमंत मुकेश अंबानी यांच्या झोळीत आणखी एक कंपनी पडणार आहे. भारतात मेट्रो कॅश आणि कॅरी व्यवसाय खरेदी करण्यासाठी रिलायन्स रिटेलने 5,600 कोटी रुपयांची बोली लावली आहे. ही नॉन-बाइंडिंग बोली असल्याचे तज्ज्ञांचे म्हणणे आहे. मात्र, ते खरेदी करण्याच्या शर्यतीत रिलायन्स एकटी नाही. थायलंडची सर्वात मोठी कंपनी चारोएन पोकफंड (CP) ग्रुपने सुमारे एक अब्ज डॉलर्स म्हणजेच 8,000 कोटी रुपयांची बोली लावली आहे. हे जर्मन कंपनीच्या अपेक्षेनुसार आहे. कंपनी जवळपास 19 वर्षांनंतर भारतातील घाऊक व्यवसाय बंद करण्याच्या तयारीत आहे.
सूत्रांनी दिलेल्या माहितीनुसार, मेट्रो इंडियाने रिलायन्स आणि सीपीच्या वरिष्ठ टीमला त्यांच्या कामगिरीबद्दल आणि भविष्यातील संभाव्यतेबद्दल एक सादरीकरण दिले आहे. हे सादरीकरण दोन आठवड्यांपूर्वी बंगळुरूमध्ये देण्यात आले होते. यामध्ये मर्चंट बँकर्सचाही सहभाग होता. याबाबत मेट्रो कॅश आणि कॅरी इंडियाच्या प्रवक्त्याने सांगितले की, आम्ही अफवा आणि अनुमानांवर भाष्य करत नाही. रिलायन्स आणि सीपी ग्रुपने या संदर्भात त्यांना पाठवलेल्या ईमेलला प्रतिसाद दिला नाही.
का बंद करत आहे कंपनी
एका सूत्राने सांगितले की, मेट्रो इंडियाची मूळ जर्मन कंपनी मेट्रो एजी भारतातील नियामक वातावरण आणि स्वदेशी विरुद्ध विदेशी यावरील सुरू असलेल्या वादाबद्दल चिंतित आहे. भारतीय कंपन्यांशी संबंधित लॉबी गटांचा आरोप आहे की विदेशी रिटेल कंपन्यांनी एफडीआय नियमांचे उल्लंघन केले आहे. मात्र, विदेशी कंपन्यांनी नेहमीच हे आरोप फेटाळून लावले आहेत. हे पाहता मेट्रो एजीचा भारतीय व्यवसाय खरेदी करण्याच्या शर्यतीत रिलायन्स आघाडीवर असल्याचे मानले जात आहे. थायलंडची कंपनीही याकडे डोळे लावून बसली आहे.
मेट्रो कॅश अँड कॅरीचे व्यापारी बँकर्स जेपी मॉर्गन आणि गोल्डमन सॅक्स यांनी कंपनीच्या व्यवसायाचे मूल्य सुमारे $1 अब्ज इतके ठेवले आहे. यासाठी अंतिम बंधनकारक बोली महिनाभरात सादर करता येईल. या कालावधीत बोलीची रक्कम बदलली जाऊ शकते, असे उद्योग तज्ज्ञांचे म्हणणे आहे. मेट्रो कॅश अँड कॅरी सध्या METRO होलसेल ब्रँड अंतर्गत भारतात 31 स्टोअर चालवते. मेट्रो एजीने 2003 साली भारतीय बाजारपेठेत प्रवेश केला. पण आता ती भारतीय बाजारपेठेतून बाहेर पडण्याची तयारी करत आहे.