मुंबई : राज्यातील सर्वात मोठा सण मानला जाणारा गणेशोत्सव अवघ्या काही दिवसांवर येऊन ठेपला असला, तरी मुंबईतील रस्त्यांवरील खड्डे अद्यापही कायम आहेत. त्याचवेळी 22 ऑगस्टपर्यंत रस्ते खड्डेमुक्त होऊन गणपतीचे आगमन सुरळीत होईल, असा दावा पालिकेचे उपायुक्त हर्षद काळे यांनी काही दिवसांपूर्वी केला होता. महानगरपालिकेचे माजी विरोधी पक्षनेते रवी राजा यांनी महानगरपालिका प्रशासनावर आरोप करत म्हणाले की, रस्त्यांवर अद्यापही 25 हजारांहून अधिक खड्डे आहेत. दरवर्षी गणेशोत्सवापूर्वी मुंबईतील रस्त्यांवरील खड्डे पालिकेकडून बुजवण्याचे स्वप्न गणेशभक्तांना पडते, मात्र उत्सव सुरू होऊनही खड्डे बुजवले जात नाहीत.
त्याचवेळी, महापालिकेतील भाजपचे माजी गटनेते प्रभाकर शिंदे म्हणाले की, रस्ते आणि खड्डे पाहण्यासाठी प्रशासकाला वेळ नाही. प्रशासन खड्ड्यांबाबत अजिबात गंभीर नाही. रस्त्यावर जाऊन खड्डे बुजवण्याबाबत कोणताही अधिकारी गंभीर नाही. मुंबईत 2055 किमी लांबीचे रस्ते आहेत. या रस्त्यांची दुरुस्ती आणि खड्डे बुजवण्यासाठी महानगरपालिकेने 2200 कोटींहून अधिक रुपयांची तरतूद केली आहे.
निविदेत कोणीही दाखवला नाही रस
भाजप नेते विनोद मिश्रा यांनी महानगरपालिकेच्या कारभारावर प्रश्नचिन्ह उपस्थित केले. ते म्हणाले की, महानगरपालिकेने नवीन तंत्रज्ञानाने खड्डे भरण्यासाठी 7 कोटींची निविदा काढली होती, त्यात एकाही ठेकेदाराने रस दाखवला नाही. खड्डे बुजवण्यासाठी महानगरपालिकेचे कोणतेही नियोजन नाही. त्यात आधी कोल्ड मिक्स भरण्यासाठी शेकडो कोटी रुपये खर्च करण्यात आले, पण सर्व अपयशी ठरले. आता पावसाळ्यात नवनवीन तंत्रज्ञान आणण्याचा नारा मारला गेला आहे, पण त्यासाठी ठेकेदार सापडत नाही. हे महानगरपालिका प्रशासनाचे मोठे अपयश आहे. यंदाही पालिकेच्या दुर्लक्षामुळे गणेशभक्तांना खड्ड्यांतून घरोघरी गणपती आणावा लागणार आहे.
आतापर्यंत किती खड्डे भरले
- महानगरपालिकेने मुंबईत आतापर्यंत 25,721 खड्डे बुजवले आहेत
- यामध्ये महानगरपालिकेने 21,541 खड्डे कोल्ड मिक्सने भरले आहेत.
- कंत्राटदाराने 2,872 खड्डे भरले आहेत, तर केंद्रीय एजन्सीने 1,310 खड्डे भरले आहेत.
- भायखळ्यात सर्वाधिक 4 हजार 147 खड्डे भरले आहेत
- दुसऱ्या क्रमांकावर कुर्ल्यात 1 हजार 844 खड्डे भरण्यात आले आहेत.