नवी दिल्ली : करचोरी प्रकरणी सरकारने तीन चिनी मोबाईल कंपन्यांना नोटीस बजावली आहे. अर्थमंत्री निर्मला सीतारामन यांनी म्हटले आहे की, तीन चिनी मोबाईल कंपन्यांवरील करचुकवेगिरीच्या आरोपांवर सरकार लक्ष ठेवून आहे.
चीनच्या तीनही मोबाईल उत्पादकांना सरकारने नोटीस बजावली आहे. राज्यसभेत प्रश्नांना उत्तरे देताना अर्थमंत्र्यांनी या गोष्टी सांगितल्या आहेत. राज्यसभेत प्रश्नोत्तराच्या तासादरम्यान पूरक प्रश्नांना उत्तर देताना निर्मला सीतारामन म्हणाल्या की या तीन चिनी कंपन्या Oppo, Vivo India आणि Xiaomi आहेत.
DRI ने चिनी मोबाईल कंपन्यांना बजावली नोटीस
ते म्हणाले, डीआरआय (डिपार्टमेंट ऑफ रेव्हेन्यू इंटेलिजन्स) ने 4389 कोटी रुपयांच्या कस्टम ड्युटी संदर्भात चीनी कंपनी ओप्पोला नोटीस बजावली आहे. हे प्रकरण देशात आयात होणाऱ्या काही वस्तूंवर सीमाशुल्क न भरणे आणि सरकारला चुकीची माहिती देण्याशी संबंधित आहे.
Xiaomi ला 653 कोटी रुपयांच्या ड्युटी दायित्वासंदर्भात पाठवली नोटीस
अर्थमंत्र्यांनी राज्यसभेत सांगितले की, चीनची दुसरी मोबाइल निर्माता कंपनी Xiaomi ला 653 कोटी रुपयांच्या शुल्क दायित्वाच्या संदर्भात तीन नोटिसा बजावण्यात आल्या आहेत. अर्थमंत्र्यांनी सांगितले की, कंपनीने एकूण शुल्क दायित्वामध्ये फक्त 48 लाख रुपये जमा केले आहेत.
अर्थमंत्र्यांनी सांगितले की, ज्या चिनी कंपन्यांना नोटीस बजावण्यात आली आहे त्यापैकी तिसरी कंपनी विवो इंडिया आहे. कंपनीकडून 2217 कोटी रुपयांच्या कर भरणाबाबत उत्तर मागवण्यात आले असून, त्यात त्यांनी केवळ 60 कोटी रुपये जमा केले आहेत.
संशयास्पद डिजिटल लोन अॅपवरही केली जात आहे कारवाई
अर्थमंत्र्यांनी राज्यसभेत सांगितले की, ‘सरकार संशयास्पद डिजिटल लोन अॅप्सवरही कारवाई करत आहे. यामध्ये त्या अॅप्सचाही समावेश आहे, जे देशाबाहेरून ऑपरेट केले जातात. ते अॅप्स देशात चालवणाऱ्यांना मदत करणाऱ्या भारतीयांवरही आम्ही कारवाई करत आहोत, जे मार्गदर्शक तत्त्वांचे पालन करत नाहीत.